Layo pa nga matuman ang dugay na unta nga Bus Rapid Transit (BRT) Project sa dakbayan sa Sugbo human nagpakahilom ang Department of Transportation (DOTr) sa pagpatuman niini.
Si Konsehal James Cuenco nga maoy chairman sa committee on transportation sa Konseho sa Dakbayan sa Sugbo, nitug-an sa SunStar Cebu sa Huwebes, Abril 28, 2022, nga ang DOTr wala makahatag sa iyang buhatan o sa local government unit (LGU) og bisan unsang updates mahitungod sa proyekto.
Si Cuenco niingon nga ang katapusang higayon nga nakig-coordinate ang nasudnong ahensya sa LGU niadtong Pebrero ning tuiga.
“Sadly, the last time they coordinated with the LGU was when they looking for a deed of usufruct over 1.6 hectare lot in SRP (South Road Properties),” matod ni Cuenco.
Sa buwag nga pakighinabi, si Mayor Michael “Mike” Rama niingon nga makig-alayon na usab siya sa DOTr aron susihon ang kalambuan sa maong proyekto.
Matod ni Rama nga bag-o lang niya giaprobahan ang earth balling sa mga kahoy sa Osmena Boulevard nga maapektuhan.
Niadtong Pebrero 8, ang DOTr ni-post og imbitasyon sa pag-bid alang sa katukoran sa imprastraktura gikan sa Kapitolyo ngadto sa Cebu South Bus Terminal (CSBT) ug pagpalambo sa link sa pantalan sa Sugbo nga mahimong kabahin sa BRT project.
Hinuon, walay updates nga gihatag ang ahensiya bisan pa sa deadline sa imbitasyon sa bid nga ni-expire niadtong Abril 4.
Atol sa iyang pagbisita sa Sugbo niadtong Marso 29, nakigtagbo si DOTr Secretary Arthur Tugade kang Presidential Assistant for the Visayas Michael Dino aron hisgutan ang mga kalambuan sa BRT project.
Si Tugade niingon nga ang konstruksiyon sa BRT kinahanglang matuman ug kinahanglang sugdan sa Hunyo 2022.
Sa bahin ni Cuenco, ang desinyo sa BRT dili makatabang sa problema sa trapiko sa dakbayan ug posibleng mosamot pa kini tungod sa hagip-ot nga mga dalan nga maagian sa maong rota.