HELLO! I miss you hurot, Super B family! Yes, feeling I belong gihapon ning inyong kiat nga amiga bisan dugay na kita wala nagka-chicka. Kumusta? Bitaw, walay char -- gimingaw gayud ko kaninyo!
Bag-ohay pa lamang, ningsibat... yes, minglayas sa ko sa among balay ug niadto sa usa ka isla diin nakahimamat ko'g mga tawo nga dunay maayong kasing-kasing nga mag-asawa nga sila Pastor Jifred ug Sis Santa sa Victory Chapel Community Church, uban ang kaigsuonang sila Love, Dats, Ging ug Payat (puro ra anggga kay "close" na kunohay mi he he).
Bitaw, niagi ko'g mga hagit sa kinabuhi. Sa dugay'ng panahon, akong gibubo akong kaugalingon sa akong pamilya bisan ako ra gayung papa ang labaw nakong hinigugma. Dili gud mi close sa akong mader kay sutil na ko bisan sa pagkabata. Mas labaw'ng pinangga gayud niya akong ate nga karon adunahan na kay siyempre ang kuwarta ug ang kinamanghuran kay hangtud karon- ginatilaplipan pa siya dala'g ingon og, "aylabyu" puli sa adlaw-adlaw niyang panglaba bisan sa dinug-an niya sa edad nga kapin 30. Bitaw, sa usa ka maestra sa pampublikong tulunghaan; nganong wa niya nasabtan nga ang inahan; dili nato mga katabang! Anyway, ganahan man akong mader utu-utuon busa bahala na siya sa iyang kaugalingon.
Nganong dili ko close sa akong mader? Dili ko ganahan mangatik. Dili pud ko mouyon kung wala namao ang mga plano o proyekto. Ako man ang nagpadagan sa negusyo sa pamilya- wala gayuy makakawat bisan akong papa nga tag-iya kay tanan naka-schedule ug nakalista. Dili puwede nang atik-atik mopalit ug tambal unya wala diay sakit. Ako gayud dalhon sa ospital ang miyembro sa akong pamilya aron ang doktor ang mosuta. Naa may kuwarta, nganong magtipid nga dili man mapalit ang kinabuhi?
Bitaw, kuwareta y tres nako, tiguwang na aron mangatik sa akong pamilya, kaugalingon ug bisan kaninyo. Mubo ra baya ang kinabuhi. Ang uban nakong higala -- wa na gyud nagginhawa. Grasya ni Lord nia -- makalaag pa ko. Wala siyempre nako gidaut akong pamilya. Last year, ika-12 nako gidala sa ospital akong papa nga kaniadto nahigugma'g alak busa ang atay ningbagtok na, mao tandugunon kaayo, higala. Tungod luya ni siya, isip anak, alalay gayud sa panginabuhian sa pamilya diin akong inahan, igsuon nga walay pulos (kay wala gayuy kontribusyon bisan motrapo sa suka sa among papa unya nagadala pa'g laki nga libre i_ _t, tulog ug kaon sa among balay diin akong papa naga-grocery pero ako ang nag-work, mare -- unya angkunon pa ang property nga bisan toothpick wala siya'y naamot sa pagpatukod niini- ang tindi!)
Reyalidad gayud kini sa mga kinabuhi nato apan imbes nga makigbugno, ningbiyahe ako ug nagbuhat sa mga butang nga makalingaw ug makapalipay nako. Tungod ang kinabuhi duna gayuy mga hagit, importante nga naa kitay kalipay pud nga masungkit. I'm saving happiness. Yes, nagapuno ko sa akong alkansiya og mga butang nga makadasig ug makalipay nako aron sa higayon nga sungugon kita sa panahon- dili kita dali nga maluya, igsuon. Tama nang maglagot o magpaguol-guol kay hamubo ra ang kinabuhi. Paglipay dala sa gasa ug grasya sa Ginoo aron makalahutay kita bisan sa unsang sitwasiyon sa kinabuhi nato. #ireallymissyou