Haya sa apuhan nagubot human nag-away ang mga apo ug usa ka tomboy nga niuwang mao nadunggaban ug nalandig sa tambalanan.
Ang insidente nahitabo sa Sitio Panaguikan, Barangay Tapon, lungsod sa Dalaguete, alas 2:10 sa kaadlawon sa Huwebes, Abril 28.
Samaran sa iyang tiyan ug nadala sa Carcar City District Hospital mao si Rose Marie Calatero, 22, tomboy ug nagpuyo sa nahisgutang lugar.
Nasikop si Raymond Frix Villarampa, 22, ulitawo, walay trabaho ug nagpuyo sa nahisgutang lugar.
Si Police Staff Sgt. Fausto Caraquitan sa Dalagaute Police Station nga nahinabi sa Superbalita Cebu, nagkanayon nga ang biktima nag-inom uban sa mga silingan samtang nagbilar sa apuhan sa suspek nga namatay.
Samtang nagtagay, nagkalalis ang duha tungod sa motorsiklo sa manghud nga gihulaman sa suspek.
Ang manghud nisukmat sa maguwang nga suspek kon nganong wala makabantay sa deperensiya sa motorsiklo.
Nahitabo ang kumusyon samtang nagbilar. Ang biktima niuwang unta sa kaguliyang sa iyang mga barkada apan ang suspek nibunot sa kutsilyo ug gihansakan si Calatero.