Usa ka 41 anyos nga amahan nga nihimong sex slave sa 16 anyos nga anak sulod sa duha ka tuig, nasikop niadtong Martes, Abril 26, alas 8:00 sa gabii sa Barangay Lambosan, lungsod sa San Remigio.
Ang amahan usa ka mamumuo, nasikop human ang biktima nitug-an sa iyang kabanay.
Si Patrolwoman Janely Mangubat sa Women and Children Desk sa San Remegio Police Station nga nahinabi sa Superbalita Cebu nagkanayon nga kagahapon sa udto napasaka na nila ang kaso batok sa amahan.
Ang biktima nitug-an nga alas 4:00 kaadlawon sa Lunes, Abril 25, gilugos na usab siya sa iyang papa.
Uban nila sa ilang panimalay ang iyang duha ka manghod nga babaye nga nag-edad og 13 ug 8 anyos.
Ang iyang inahan naa sa dakbayan sa Sugbo nagtrabaho apan duha ka tuig na nang buwag sa iyang amahan.
Ang biktima nibutyag nga human nagkabuwag iyang papa ug mama, siya ang pahungawan sa lawasnong kahigal niini sud sa duha ka tuig.
Ang iyang inahan nilakaw ug wala na nipauli sa ilang panimalay.
Ang bata nibutyag nga ang iyang amahan estrikto kaayo nilang managsuong babaye. Bisan gamay ra diperensiya o masipyat sila sa trabaho o sa pagtubag, kulatahon dayon.
Grabi kaayo nila makabunal hinungdan nga mag-antos sila sa kasakit.
“Dili gusto sa ilang papa nga maghalobilo sa ubang mga bata, ilang paryente kay kon makit-an mabunalan dayon,” dugang ni Mangubat.
Ang biktima dihang nakahigayon pagtan-aw sa kalingawan, nakasulti sa iyang kabanay hinungdan nga gi-report sa kapulisan.
Ang biktima mipadayag nga gumikan sa iyang kahadlok sa iyang amahan, wala siya dayon nitug-an.
Dugang niini nga 10 anyos palang siya gimolestiya na sa iyang amahan.
“Usahay gamiton daw siya sa iyang papa 3 times a week .Dunay panahon nga ka upat human nagkabuwag sa iyang mama,” dugang sa biktima
Ang suspek hugtanong nanghimakak sa pasangil batok kaniya. Nipadayag nga ang iyang anak gihilabtan sa laing tawo dili siya