Taliwala sa tungason sa pagbiyahe paingon sa Sityo Dam-an, Barangay Pamutan, bukirang bahin sa dakbayan sa Sugbo, worth it ang inyong pagbiyahe kay masinati ang himaya sa pag-abot sa Heavenly Mountain Resort.

“Experience Paradise here on Earth,” tagline sa Facebook page sa Heavenly Mountain Resort.

Ang maong resort gisugdan og tukod niadtong Mayo 1, 2021 nga nagsugod lang sa usa ka damgo sa tag-iya nga si Ginang Estela Labitad, 60, horticulturist nga residente sa Pamutan.

ASA DAPITA?

Ang maong facility adunay gibana-bana nga walo ngadto sa siyam ka kilometro ang gilay-on kon manukad sa Barangay Tisa, Cebu City subay sa Barangay Toong.

Samtang kapin sa unom ka kilometro ang distansiya kon mosubay gikan sa Our Lady of Guadalupe Parish Church, Barangay Guadalupe.

Accessible ang lugar sa kadtong adunay pribadong kasakyan, mamahimong mogamit og directional apps o mangutana sa mga tawo sa maong dapit alang sa direksiyon.

Samtang adunay habal-habal nga alternatibong kasakyan niadtong mag-commute nga adunay pletehan nga P100 – P150 matag pasahero, o depende sa sabot ngadto sa drayber.

Ang resort mismo mo-offer og kasakyan nga mohatod-kuha niadtong guest ilabi na kon grupo.

Sa kantidad nga P150 nga biyahe sa Isuzu Elf nga magamit sa resort aron paghakot sa ilang guests ilabi na niadtong 20 ka tawo nga gidaghanon.

GISUPAK

Ang istorya luyo sa katukoran sa Heavenly Mountain Resort mao nga nahuna-hunaan ni Labitad ang pagtukod og resort nga iya unyang kalingawan nga negosyo gawas sa iyang pagpaninda og ornamental plants nga iyang gipangunayan og atiman.

“Dugay ni nakong huna-huna, magtukod ko aning negosyoha. Maayo nalang matiguwang ko, molingkod na lang ko og naay maligo lima ka buok, may nalang makapalit kog bugas,” pamahayag ni Labitad.

Apan ang maong damgo gisupak sa kapikas ni Labitad sa kabalaka nga dili nila kini kahatagan og katumanan tungod sa dakong kantidad nga gikinahanglan sa higayon nga motukod og swimming pool.

Inabagan sa pag-ampo, wa magpapugong si Labitad sa iyang damgo taliwala sa pagsupak sa iyang bana, inay iyang gihangyo ang iyang ig-agaw nga si Fredo Verano, ilado nga landscaper, nga maoy modesinyo ug mohimo sa maong resort.

SAMA SA PANGANOD

Ginganlan og Heavenly Mountain Resort ang maong facility tungod sa desinyo sa pool nga daw sama sa panganod dili ang naandan nga swimming pool nga sagad makita sa ubang resort.

Nakalahi sa maong pool mao ang tubig nga gigamit nga direkta nga naggikan sa tubod sa Barangay Pamutan.

Makasiguro ang mga guest nga limpyo ug wa gamiti og chlorine tungod kay regular ang paghabwa sa tubig ug ilisan og fresh water gikan sa tubod nga nahimutang sa luyo nga bahin sa facility.

Ang maong pool adunay gilawmon nga 6, 5 , 4 ug 3 feet ug adunay man-made nga waterfalls, langob diha sa pool ug tower nga masud-ong ang kinatibuk-ang property nga nakapadugang sa atraksiyon.

Gawas sa talagsaong kasinatian nga masuwayan sa mga manuroy sa Heavenly Mountain Resort, barato ra ang entrance fee.

RATE

Entrance fee: P100 - 11 years old above, P50 – 10 years old below.

Cottage adunay P300 nga kasudlan sa walo ngadto sa 10 ka tawo, alang sa gamay nga grupo adunay tables and chairs sa tag-P100.

Mamahimong makadala og pagkaon ang mga guest ug ilimnon.

Apan nagpadayon ang gihimong pagpalapad sa maong resort sa dihang gisugdan na og tukod alang sa overnight accommodation ug ang ikaduhang andana niini mahimutang ang tindahan.

Alan sa dugang inquiries niadtong mga interesado, mamahimong makaduaw sa ilang official Facebook page nga Heavenly Mountain Resort o ang pagtawag sa mobile number ni Ginang Estela Labitad: 09269640395./Ubang hulagway gikan sa Heavenly Mountain Resort Facebook page