Pastilan. Hingpit na lang nga napalagpot ang Brooklyn Nets sa playoffs apan wa gihapon makaduwa si Ben Simmons, ang kanhi pambato sa Philadelphia Sixers nga ilang gibaylo sa beteranong star player nga si James Harden.
Sa pangutana kon kinsay nakaginansiya sa Simmons-Harden trade nga gipahigayon sa tunga-tungang bahin sa season, labing siguro ang pabor atoa sandig sa Sixers, at least sa pagkakaron.
Kini tungod kay napahimuslan man dayon sa Philadelphia ang kalantip ni Harden nga maoy usa sa mga hinungdan sa ilang pagsulod sa semifinals round sa Eastern Conference.
Ang Nets sayong nanamilit sa playoffs nga way daog sa round 1 batok sa Boston Celtics, 0-4, samtang ng Sixers, sa ilang bahin, yanong mipalagpot sa Toronto Raptors sa Game 6, 4-2, aron motikang sa sunod round batok sa Miami Heat kinsa yano ra usab nga mipatugdon sa Atlanta Hawks.
Paduwaon na unta sa Nets sa Game Four si Simmons apan gawas sa problema sa mental health, nakabaton pa gyud kini og panakit sa iyang buko-buko, hinungdan wa gyud makatabang sa team.
Sa nahitabo sa Nets nga daw og gipakauwawan sila sa Celtics, makalaom ta nga adunay dakong kausaban sa ilang lineup alang sa sunod season.
Except nila ni Kevin Durant, Kyrie Irving ug Simmons nga wa pa gyud masubhi, daghan silag mga piyesa nga magamit nila sa pag-trade.
Kini sama nila ni Blake Griffin, LaMarcus Aldridge ug Carmelo Anthony.
Kadudahan usab si Patty Mills ug Joe Harris kon makapirma ba og balik. Ubos ra kaayo ang ilang performance.
Sa laing bahin, sa pagtikang sa Celtics sa laing ang-ang sa playoffs, makutas nga dalan nga ilang agion tungod kay ang defending champion Milwaukee Bucks man ang ilang makontra.
Hinuon gikataho nga di makaduwa si Kris Middleton, ang lig-ong backup ni Giannis Antetokounmpo ning maong series.
Ang Dallas Mavericks impresibo usab nga nakasulod sa playoffs. Kon sa una, permi silang magkombitay sa ikawalo nga puwesto sa Western Conference, karon hamugaway silang miangkon sa ikaupat nga luna ug ila pa gyud napalagpot ang Utah Jazz nga maoy no. 1 contender sa miaging season.
Bisan tuod ilang nausikan ang 7-footer nga si Kristaps Porzingis pinaagi sa trade, apan daw og nakakita og saktong chemistry si coach Jason Kidd ubos sa pagpangulo ni seasoned-point guard Luka Duncic.
Sama sa Celtics, lisod usab nga dalan ang subayon sa Mavs kay ang Phoenix Suns man maoy ilang maatbang sa West semis.
Ang Suns nga maoy no. 1 sa Western Conference, niabot sa NBA finals sa niaging season apan napildi kini sa Bucks, 4-2, sa series bisan pa man og nakauna na unta kini sa serye, 0-2.
Ang laing title-contender Golden State Warriors makigbatok sa Memphis Grizzles nga nipukan usab sa Minnesota Timberwolves, 4-2.
Taas pa man toud ang latason, pero sa akong hamubong pangagpas ang Suns ug Sixers maoy mag-abot sa finals. (jun.migallen22@gmail.com)