Niadtong Dominggo ni-discuss ko sa imprastraktura alang sa bike lanes. Niingon ko nga angay nang hunungon while niingon sab ko nga angay nga maghimo og bike lanes.
Ang akong buot ipasabot nga undangon na mao ang pagbutang og bike lanes nga gipintal lang sa mga karsada, sa Mandaue, Cebu City ug Talisay. Igo nang gipamutang sa Dept. of Public Works and Highways (DPWH) sukad sa pagsugod sa pandemic. Di na kinahanglan pang dugangan kay usik na kaayo sa kuwarta.
Inay magbutang og mga linya sa karsada, mas maayo nga sa tanang road building ug expansion, ilakip sa plano ug gahin ang separate bike lanes ug sidewalk. Mas maayo man gud nga dunay lahi nga bike lane, di kay himuon nga tipik sa karsada nga agianan sa mga sakyanan. Kon applicable ni sa ubang mga nasod, dinhi sa Pilipinas nga daghan ang motorcycle riders, di kini angay.
Sa mga bike lanes karon nga gipintal, kanunay nga mosulod ang mga nagmotorsiklo, mosubay kon huot na ang trapiko. Bisan sa Mandaue nga estrikto, anha manubay ang daghang nagmotorsiklo.
Gawas niini, sa Dakbayan sa Sugbo daghan sa mga sakyanan ang nag-park sa mga bike lane bisan kon kapila na manakop ang mga tinugyanan sa Cebu City Transportation Office (CCTO). Kay sa dugay na nga panahon, ang mga tag-iya og sakyanan ug establisemento nangaanad na sa pag-park sa mao nga mga dapit.
LAHI
Sa akong nakita sa Malaysia dihang nakabisita ko og makadiyot sa 2014, duna silay lanes sa motorcycle sa ilang mga expressway nga lahi sa atoa kay gitipon ra sa four-wheeled o gi-ban sa pag-agi ang two-wheeled.
Inay maghimo og bike trail sama sa ubang mga nasod, mas maanindot kon kini i-incorporate sa mga road widening ug tukuron nga mga karsada. Ang standard nga gilapdon ang bike lane nga gihimo diha sa Cebu South Coastal Road (CSCR).
Di lang gasto ang tan-awon sa gobiyerno, kon di ang maayong epekto niiini ngadto sa iyang katawhan, kadaghanan maoy tinubdan sa buhis nga nagpadagan sa makinarya sa kagamhanan.
Seguradong mopadaghan ni sa mag bike, padung sa trabaho ug recreational. Managhan ang mga negusyo, sama sa pagkaon, kape ug uban pa. Managhan ang mga tindahan sa biseklita ug paayuhanan. Managhan ang negusyo, mosaka ang buhis.
Makaayo usab ni sa panglawas. Ang healthy nga katilingban productive nga makaayo sa ekonomiya. Minus ang magasto sa gobiyerno sa health. Mas maayo, di ba?
WA MAKITA
Kon moplano ang kagamhanan sa mga imprastraktura, ang makita lang mao ang galastuhan, di ang epekto niini ngadto sa katawhan sa kinatibuk-an.
Namatud-an na man nga kon mo-invest ka sa mga imprastraktura, daghan ang maayong epekto niini. Sa karsada, kon paspas ang lihok mga baligyaon, mas makaayo kini sa ekonomiya. Dinhi lang sa Cebu, binilyon ka pesos ang mausik kada tuig.
Hinaut pa nga aning gisugdan pagtrabaho nga mga karsada, naa na ang bike lanes ug sidewalk. Gasto tuod, apan ang epekto niini sa ekonomiya ug sa katawhan sa kinatibuk-an, dako kaayo sa umaabot nga katuigan.