Hapsay ug han-ay ra ang tulo ka adlaw nga absentee voting nga gisugdan sa Miyerkules Abril 27-29, 2022 sa Abellana Nation School.
Sa data nga gipahibawo sa Police Regional Office 7 (PRO 7) sa 2,767 ka PNP personnel nga naka apply aron mo-avail sa absentee voting, 2,737 lang ang nakabotar samtang ang 30 adunay rason kon nganong wala sila makatunga sa tulo ka adlaw nga botasyon.
Ang Regional Personnel Records Management Division ug Provincial Administrative and Resource Management Units sa tibuok isla sa Sugbo maoy ni- facilitate sa tulo ka adlaw nga absentee voting sa pakig-alayon sa matag buhatan sa Comelec sa lainlaing lugar sa Sugbo.
Lakip sa ningsalmot sa absentee voting ang pipila ka mga sakop sa media, Armed Forces of the Philippines (AFP) ug ubang personnel sa National Support Unit sa PNP nga dili mamahimong makabotar sa local nga mga kandidato sa ilang dapit tungod kay gipang destino sa laing lugar.
Si Police Brigadier General Roque Eduardo Vega, hepe sa PRO 7, nihulagway nga generally peaceful ug wala siyay nabantayan nga problema ug walay insidente nga nahitabo.
“Of the 2,767 PNP local absentee voters, 2,737 or 99% cast their votes, 30 or 1% were unable to vote for varied reasons. Nonetheless, I am satisfied with the result,” matod ni Vega. Gipasalig ni Vega sa publiko nga andam na ang kapulisan sa Central Visayas sa pagpatuman sa siguridad atol sa May 9, 2022 elections.
Si Police Lt. Col. Wilbert Parilla, deputy director for operations sa Cebu City Police Office (CCPO), sa iyang bahin, niingon nga sa 458 nga ni-apply sa absentee voting, silang tanan nakabotar.
Human sa tulo ka adlaw nga kalihukan, malampuson usab nila nga gibantayan ang mga balota nga gihatod sa buhatan sa Commission on Elections (Comelec) sa dakbayan sa Sugbo nga mao na usab ang mopadala niini sa kaulohan.