Panday nga giingong napakyas sa paglugos sa usa ka menor de edad ug gituohang nahadlok nga madakpan naghikog pinaagi paghigot sa liog alas 9:40 sa buntag sa Sabado sa Sta. Rita, lungsod sa Poro, mga isla sa Camotes, Sugbo.
Mga ngan gipugngan ning mantalaan kay ang menor nga giingong suwayan unta og lugos kabanay ra.
Si Mundo (di tinuod niyang ngan), 37, panday, minyo, nagpuyo sa nahisgutang lugar, patay nang naabtan sulod sa ilang balay dihang nangabot ang mga barangay tanod, opisyal, ug kapulisan.
Si Police Staff Sgt. Jomar Marquez, imbestigator sa Poro Police Station nga nahinabi sa Superbalita Cebu, nagkanayon nga si Mundo gireklamo sa 15 anyos nga pag-umangkon sa iyang asawa.
Sumala pa ni Marquez nga ang dalagita nagdagan nga nangayo og panabang kang Kapitan Nicasio Toralba ug sa mga tanod sa barangay hall.
Nipasangil ang dalagita nga ang iyang uyoan hayan buot molugos kaniya.
Niasoy siya nga samtang siya nahinanok sa pagkatulog, kalit nga nisulod si Mundo ug gitabunan og unlan ang iyang nawong.
Naglisod siya sa pagginhanwa hinungdan nga naningkamot siya sa pagsukol.
Nipasangil ang dalagita nga gisumbag ni Mundo makaduha ka mga higayon ang iyang tiyan.
Gituok siya apan naningkamot gihapon sa pagkisi-kisi hangtud nga nakabuhi ug nilampos.
Nakadagan siya ug nakagawas sa balay dayon niadto sa barangay hall aron mangayo og tabang.
Dihang niabot siya sa barangay hall, iyang gitug-anan si Toralba ingon man ang iyang iyaan nga tanod nga asawa ni Mundo.
Gialarmahan sa kapitan ug mga tanod apan sa ilang pag-abot sa balay, patay nang nagbitay si Mundo.
Gitabang nila ug nanawag sila og doktor ingon man pulis, apan wa na masalabar.