Taas nga linya sa mga sakyanan ang naghuwat sa pagbukas sa Cebu- Cordova Link Expressway (CCLEX) sa Sabado sa hapon, Abril 30, 2022, human kini nila gipahibawo sa publiko nianang buntag.
Mga duha ka kilometro ang linya sa mga sakyanan nga naghuwat sa habig sa lungsod sa Cordova samtang puno usab ang parking area sa Il Corso sa Cebu South Coastal Road (CSCR) sa habig sa dakbayan sa Sugbo.
Mga motorista kini nga gustong makauna og agi sa unang adlaw sa pagbukas sa taytayan nga gikahinaman og maayo sa mga Sugboanon human sa upat ka mga tuig nga pagpinaabot.
Mao kini ang gibutyag ni Cebu-Cordova Link Expressway Corp. president Allan Alfon sa interbyu sa mga tigbalita dihang ilang gibuksan ang ikatulong taytayan sa Mactan sa alas 5:08 sa Sabado sa hapon.
Matod ni Alfon nga ilang gipaabot ang daghang mga sakyanan nga mangagi sa CCLEX matag adlaw.
Ila usab nga napanglantawan nga mopaluag kini sa trapiko sa Metro Cebu.
Wa na kinahanglana sa mga lumolupyo sa habagatan sa dakbayan sa Sugbo ug habagatang Sugbo nga moadto pa sa kinapusoran sa siyudad ug Mandaue City sa pag-adto sa Dakbayan sa Lapu-Lapu, padulong man sa airport, negusyo ug trabaho.
Sa pagkakaron, matod ni Alfon nga cash una ang ilang dawaton sa mangagi nga mga motorista hangtod nga makaparehistro na ang tanan nga buot moagi sa taytayan.
Ang management sa taytayan nagpadayon sa ilang pagpanaud og mga radio frequency identification (RFID) sa mga sakyanan.
Si Rodrigo Franco, presidente sa Metro Pacific Tollways Corp. (MPTC), niingon nga nalipay sila nga nabuksan na gyud ang CCLEX human sa nangaging duha ka mga bagyo, Odette niadtong Disyembre ug Agaton sayo sa Abril.
Iyang gipaneguro nga luwas nga agian sa mga motorista ang taytayan.
Matod ni Franco nga ang CCLEX maoy una nilang pagbubo sa puhonan sa Sugbo ug nangita sila og lain pang kahigayunan sa pag-invest.
Di pa hinuon makaagi ang mga motorsiklo nga 125cc hangtod sa 399cc kay sa Hulyo pa kini paagion, ingon man sa mga bisiklita ug mag-jogging.
SPEED
Ang CCLEX nitakda og maximum speed sa mga sakyanan nga mangagi sa CCLEX nga usa ka “traffic discipline zone.”
Dunay magpatrolya nga mga patrol crew sulod sa 24/7.
“As the CCLEX starts operations today, the motoring public is asked to drive at a maximum speed of 60 kph. The CCLEX is designed for maximum speed of up to 80 kph but the CCLEC is implementing a 60 kph limit during initial operations as part of safety measures because motorists are still not familiar with the expressway,” matod sa opisyal nga pamahayag sa CCLEC.
Gawas sa traffic personnel, duna say 100 ka modernong mga camera ang gipangtaud nga makaila sa mga sakyanan nga mangagi nga makahimo og kalapasan sa balaud sa trapiko.
Ilang gidili ang paghunong sa mga sakyanan samtang nagsubay sa taytayan.
BAYRANAN
Ang bayranan sa sakyanan mao ang mosunod:
P90 sa Class I vehicles sama saawto, jeepneys, pick-ups, vans, ug motorsiklo. Ang CCLEC nagtan-aw kon pila ang diskwento sa mga motorsiklo nga ubos sa 400cc.
Tag P180 usab alang sa Class I nga mga sakyanan nga labaw sa 7ft. ang gitas-on (gawas kon ang top load dunay recreational equipment sama sa biseklita, surfboards, ug sama niini nga luwas nga gihigot ug di alang sa commercial nga gamit).
Tag P180 usab alang sa Class II nga mga sakyanan sama sa light trucks, tourist/school ug public utility buses.
Tag P270 alang sa Class III nga mga sakyanan sama sa heavy ug multi-axle trucks ug trailers.