Manag-uyab nga nag-date sa kalibunan o kasagbutan sa Sitio Bibina, Barangay Looc, dakbayan sa Danao, ang gitulis sa wala mailhing tawo, alas 9:30 sa gabii sa Biyernes, Abril 29.
Naminghoy si John (dili ngan), 19, ulitawo ug taga Barangay Calawisan, dakbayan sa Lapu-Lapu, ug ang iyang uyab nga si May (di tinuod ngan), 18, taga Barangay Suba sa Danao.
Si Police Staff Sgt. Allan Vertucio sa Danao Police Station nga nahinabi sa Superbalita Cebu, nagkanayon nga ang mga biktima ni-report sa krimen sa alas 7:55 sa buntag sa Dominggo, Mayo 1, 2022.
Sumala pa, ang manag-uyab wala dayon maka-report sa insidente sa kapulisan gumikan sa ilang kahadlok basin sundan sa tulisan.
Matod ni Vertucio, ang manag-uyab naghinamhinam na unta sa ilang date dihang niabot sa nahisgutang lugar nga nagmotorsiklo.
Ug gumikan sa kabugnaw sa palibot ug kamingaw sa lugar, dugang sa pulis, ang duha nilahos sa sudlunon nga lugar sa kalibunan.
Apan kalit lang nga usa ka wala mailhing lalaki ang nition kanila og armas ug nideklarar og tulis.
“Kalit ra man gitiunan sa armas ilang agtang, gipanguha ilang selpon,” dugang asoy ni Vertucio.
Apan wala makamay-on ang mga biktima sa nag-inusarang tulisan tungod sa kangitngit sa palibot.
Human sa pagpanulis, nagdali pagsibat ang tulisan nga dala ang ilang mobile phone nga Iphone XR nga balor og P28, 000 ug Vivo Y15 nga nagkantidad og P10,000.
Hinuon wala dad-a ang motorsiklo. Ang manag-uyab wala na modayon sa ilang pag-date sa kalibunan ug nanguli.
Ang kapulisan sa Danao naniid karon sa responsable sa pagpanulis sa manag-uyab sa hulit nga dapit.
Tambag sa kapulisan, maayong mag-date sa tukma nga lugar, dili sa mangitngit nga kalibunan ug awaaw nga dapit.