Nakaangkon og unom ka mga samad pinusilan si Police Lieutenant Colonel Chuck Barandog human sila pusila sa duha ka wa mailhing mga gunman mga alas 10 sa Dominggo sa gabii, Mayo 1, 2022.
Si Barandog kuyog sa iyang asawa si kanhi Cebu City Medical Center (CCMC) administrator Yvonne Cania-Barandog luwan sa usa ka pick-up truck nga dunay logo sa STL party-list dihang gipamusil sa may eskina sa Pope John Paul II Avenue, Cor. F. Cabahug St. Barangay Mabolo, Dakbayan Sugbo.
Ang duha ningbutyag sa ilang campaign sorties nga nakasal na sila sa usa ka civil wedding rites.
Matod sa usa ka tinubdan nga nihangyong di nganlan nga si Barandog kritikal samtang si Cania dunay samad sa tiyan, apan naa na sa luwas nga kahimtang.
Matod sa tinubdan gikinahanglang operahan si Barandog.
Si Barandog dunay mga samad sa abaga, tiyan ug ubang bahin sa lawas, dugang sa tinubdan.
Bisan sa iyang mga samad, si Barandog mao pay niaswat kang Yvonne padung sa usa ka taxi nga nidala kanila sa pribadong tambalanan.
Hangtod ning pagsuwat, wa pay opisyal nga pamahayag ang Cebu City Police Office (CCPO) kalabot sa hitabo.
Bisan ang imbestigador sa Mabolo Police Station nga didto sa crime scene nidumili sa pagluwat og pamahayag kay gidid-an siya dihang interbyuhon na unta sa Superbalita Cebu alas 12 pasado sa kaadlawon sa Lunes, Mayo 2 sa Superbalita Cebu kay gidid-an siya.
Matod niya nga ang kadagkuan lang sa CCPO ang moluwat og mga pamahayag sa media, apan hangtod ning pagsuwat, wa pa silay giluwatan.
Bisan ang Scene of the Crime Operations (SOCO) personnel wa moluwat og mga pamahayag.
Sa pasiunang report sa Mabolo Police Station sa Mayo 1, si Police Staff Sergeant Estipen Padillo, escort nila ni Barandog, niingon nga duha ka mga gunman ang namusil kanila samtang sakay sila sa pick-up truck.
Wa na siya masayod diin padung ang duha ka mga gunman.
Wa usab maklaro sa taho kon nakabawos ba siya sa pagpusil.
Matod sa usa ka saksi nga nahinabi sa Superbalita Cebu nga gihuwat sa gunman nga dayong go sa signal sa traffic light dihang namusil.
Kusog nga mga buto ra ang iyang nadunggan ug sunod niyang nakita mao ang sakyanan nila ni Barandog nga wa na makadagan labang sa crossing sa karsada.
Labing minos lima ngadto sa unom ka mga buto ang iyang nadunggan.
Si Barandog maoy nagmaneho sa pick-up samtang ang mga igo sa pinusilan sa sakyanan diha lang sa driver’s side.
Nakita sa Superbalita Cebu nga dunay upat lang ka dug-ol nga mga igo sa windshield sa driver’s side.
Gikataho nga ning bag-ohay lang,gibalhin si Barandog gikan sa Cebu City Mobile Force Company ngadto sa Camp Crame sa wa pa matino nga rason.
Apan kanunay siyang makita nga kuyog kang Yvonne sa mga campaign sortie niini bisan kon gidili panahon ning eleksiyon taliwa sa kamandoan sa Philippine National Police nga sila ‘non partisan’ kun way gilabanan ning piniliay sa Mayo 9, 2022.
Sa miaging tuig, gikompirmar ni Barandog ang iyang planong pagdagan sa pagka mayor sa 2022 elections, apan wa madayon.
Si Yvonne usab maoy number 1 nominee sa STL party-list.