GIABLIAHAN na sa publiko ang Cebu-Cordova Link Expressway (CCLEX) niadtong Sabado (April 30) homan nga gi-inugorahan ni Presidente Rodrigo Duterte niadtong Marso 27 atol sa selebrasyon sa Kadaugan sa Mactan. Kining ikatolo nga tulay nga nagsumpay sa dakbayan sa Sugbo ug sa isla sa Mactan nga adto moagi sa lungsod sa Cordova maoy usa sa mga garbo sa administrasyon ni Presidente Duterte, nga motapos Hunyo 30.
Grabe ang trapiko sa CCLEX niadtong Sabado tungod kay nakuratan ang nagdumala sa CCLEX sa pagdagsa sa daghan nga motorista nga gusto makasuway og agi aning bag-o ug ikatolo nga tulay, nga dunay gilay-on nga kapin sa walo ka kilometro.
Gani kagahapon, misuway mi Dr. Malou og tabok sa bag-ong tulay nga didto mi nanukad sa Cordova sa akong tuyo nga makasinati ko sa tinuoray sa sitwasyon sa trapiko sa Cordova sap ag-abli sa CCLEX.
Kabalikon mi sa among agi sa among pag-abot sa eskina sa Marigondon padulong sa Cordova kay nag-urong ang trapiko tungod sa caravan ni Mayor Ahong Chan ug sa iyang Partido gikan sa Roro Port sa Cordova, nga nakabara sa mga sakyanan nga padulong sa CCLEX.
Ang gagmayng dalan sa Cordova nakadugang sa trapiko sa Cordova tungod kay Dominggo daghan ang mga sakyanan nga nanuroy bisan kon nagsugod na ang Alert Level 2 kagahapon tungod sa naghinay-hinay nga pagbalik sa kaso sa mga natakdan sa Covid-19 Omicron variant.
Dako ang trabaho sa kapulisan ug traffic enforcer sa bahin sa Cordova tungod kay ang dalan padulong sa CCLEX ug ang mogawas gikan sa tulay anha mag-abot sa T-intersection sa Cordova nga dili halapad ug nayagaw sa mga drayber nga naglibog asa moagi. Di kapugngan ang kahinam sa mga motorista nga motabok sa CCLEX bisan sa P90 nga bayad sa matag awto nga mosulod. Daghan ang nasayop sa ilang pagtuo nga libre pa ang tulay sulod sa usa ka buwan. Kinsa kaha ang nagbalita nga libre?
Sa 80kph nga kagusgon nga dagan sa mga sakyanan nga gitugot sa CCLEX, dako na ang 20 minutos nga daganon ning walo ka kilometro nga tulay. Sa among pagtabok sa tulay, daghan ang mihunong nga mga motorista sa stopping bay ug nagpahulagway.
Ako usab naobserbahan kagahapon nga taas ang linya sa mga sakyanan nga adto mogawas sa Cordova tungod kay ang eskina sa dalan Cordova usa ka bottleneck sa termino pa sa trapiko dili sama sa gawasan sa bahin sa SRP sa Cebu City nga halapad ang dalan.
Samtang nagmaneho ko sa awto nga hanoy ang dagan aning bag-o nga tulay padulong sa SRP, misantop sa akong pangisip ang usa ka pangutana: kinsa ang mabulahan aning ikatolo nga tulay? Sa walay malisya, ang mga establisamento sa SRP ang nakapabor tungod kay sila ang mabulahan sa mga motorista nga moagi sa CCLEX gikan sa Cordova.
Pagkadakong labad sa ulo sa drayber nga anha moagi sa CCLEX nga moadto sa airport. Segurado nga mabara sa Cordova ang mga sakyanan nga padulong sa airport. Ang CCLEX di agianan sa nagdali padulong sa airport.