Sugod karong adlawa, mga lima ka adlaw na lang ipahigayon ang bugnong lugaynon sa May 9, daghan na kaayo sa mga kandidato ang nakulbaan karon ug posible ang pipila kanila di na kaayo ganahan matug panahon sa kagabhion kay naghunahuna na unsay mahitabo human sa eleksiyon.
Nahimo na ra ba nga kultura sa mga tawo nga moapil sa piniliay sa atong nasud nga di moangkon nga napildi sila apan morason nga sila gitikasan sa ilang kaatbang hinungdan nga wa milampos ang ilang tinguha aron makaserbisyo sa katawhan. Taas kaayo ang proseso niini kay ipahigayon man ang protesta ngadto sa buhatan sa Commission on Elections unya magpresentahay na usab sa ilang tagsa-tagsa ka mga ebidensiya.
Sama kini sa nahitabo nga protesta nga gisang-at ni kanhi senador Ferdinand “Bongbong” Marcos nga nagpapili sa pagka-bise presidente batok kang Bise Presidente Leni Robredo nga nilanat og hapit lima ka tuig una nahatagan og pinal nga desisyon sa Korte Suprema nga napildi gyod si Marcos.
Mao usab kini ang nahitabo sa piniliay kaniadto ni Kongresista Benhur Salimbangon sa ikaupat nga distrito sa lalawigan sa Sugbo dihang nisang-at og protesta si kanhi kongresista Celestino “Tining” Martinez III. Ang desisyon sa Korte Suprema nga midaog si Martinez apan napakanaog nga tulo nalang ka mga nahabilin nga sesiyon ang Kongreso niadtong 2010.
Kining mga panghitaboa posible nga masubli human sa Mayo 9 busa angay lang nga ang mga kandidato karon diin anaa na sila sa upat ka adlaw nalang sa kampanya segurohon nga klaro nga maangkon na nila ang ilang kadaugan nga ug nga dili na moabot sa protesta.
Aron mahitabo kini, di malikayan nga daghang mga paagi ang buhaton sa mga politiko aron lang makuha nila ang buto sa katawhan. Lakip niana ang pagpanghatag og kwarta diin niana nga paagi mahanaw na ang ilang kulba kay gipamalit nila ang mga tawo. Apan di kini maseguro kay daghan na kaayo nga mga kandidato kaniadto nga nagpabaha sa ilang salapi pero wa man gihapon nidaog.
Kon manawat man gani mo og salapi sa mga politiko hunahunaa ninyo sa makadaghang higayon kon kanang kandidatoha angayan ba nga hatagan nato sa atong suporta aron maoy mohatag sa direksyon sa kaugmaon sa atong nasud ug sa mosunod nga henerasyon. (josephelvirtubilan@gmail.com)