Ang mga senior citizen sa dakbayan sa Mandaue mobotar sa polling precincts karong Mayo 9, 2022 nga eleksiyon.
Kini ang pamahayag ni Diosdado Suico, ang pangulo sa Office for Senior Citizens Affairs (OSCA), nunot sa hugonhugon nga did-an tungod sa hulga sa pandemiya sa Covid-19.
Hinuon, dugang niya, ang Commission on Elections (Comelec) nagplano sa pagbutang og special polling precincts nga gidesinyo alang sa seniors sa pagseguro sa kaluwasan sa ilang panglawas batok sa virus.
Si Suico nagkanayon nga ang senior citizens sa dakbayan kinahanglan nga makahimo sa ilang katungod sa pagbotar sa Mayo 9 nga eleksiyon ug ang pandemiya dili makasanta kanila.
Dugang ni Suico, ang Comelec nanawagan sa tanang pangulo sa senior citizen sa nasod alang sa usa ka tigom sa pagtuki bahin sa pagbutang og special polling precinct sa seniors, lahi sa regular voters.
Ang senior citizens giila sa Department of Health (DOH) nga usa sa mga vulnerable sector, dali matakboyan sa paspas motakod nga virus.
Dihang gipangutana kon ang Comelec temporaryong mosuspenso sa pagbotar sa senior citizens onsite sa Mayo 9 tungod sa hulga sa virus, si Suico nagkanayon nga mosunod lang sila sa balaod apan dili siya mohunong sa pagpakigbisog alang sa ilang katungod.
“If the government decides, then we could not do anything about it. However, I would personally stand for my right as a senior citizen and one of the representatives of this sector. This our right to suffrage, and the pandemic could not stop it,” matod ni Suico.
Ang Mandaue dunay dul-an sa 24,000 ka seniors base sa ilang talaan sa Abril 2022. Ang tanan pulos registered voters, dason ni Suico.
Ang senior citizens makadawat og kinatibuk-an nga P8,000 nga financial assistance matag tuig gikan sa lokal nga kagamhanan sa Mandaue City, apan tungaon kini sa paghatag, Mayo ug Disyembre.
Nag-unang rekisito sa pagdawat sa maong ayuda sa senior citizen mao nga kinahanglang residente sa Mandaue City ug naa nalista sila sa voter’s registration record (VRR).
Dugang sa lagda sa ayuda, ang senior nga botante kinahanglang nakabotar og dili mominos sa duha ka miaging eleksiyon aron mahatagan sa maong cash assistance.