Mga motorista ug mga sumasakay nga paingon sa Talisay City ug ubang bahin sa habagatang Sugbo giawhag sa pagplano daan sa ilang mga biyahe kon gusto silang makauli og sayo sa Martes sa gabii, Mayo 3, 2022.

Kini human ang City of Talisay Traffic Operations and Development Authority (CT-TODA) nipahibawo niadtong Lunes, Mayo 2, nga posibleng maapektuhan ang trapiko sa Cebu South Coastal Road (CSCR) sa grand rally nga gipasiugdahan sa Alayon Party sa Barangay Lawaan 2 sa Martes sa gabii.

Ang grupo sa Alayon sa Talisay City, pinangulohan ni reelectionist Mayor Gerald Anthony “Samsam” Gullas Jr., mopahigayon sa ilang grand rally sa bakanteng lote sa Barangay Lawaan 3, atbang lang sa Talisay City Hall, sugod alas 6:30 sa gabii.

Si Jonathan Tumulak, hepe sa CTTODA, niingon nga sa dili pa ang rally mahitabo usab ang torch parade sa mga dumadapig sa Alayon gikan sa 22 ka mga barangay sa Talisay.

Gawas sa CSCR, si Tumulak niingon nga ang mga dalan nga maapektuhan sa rally mao ang N. Bacalso Avenue gikan sa Bulacao paingon sa Mananga Bridge sa Tabunok; Toledo Wharf Road gikan sa Lagtang pinaagi sa Tabunok Flyover; A. Bacaltos Avenue gikan sa Barangay Pooc hangtod sa Lawaan 3; Sangi Road gikan sa Barangay Tabunok hangtod sa San Isidro; Washington St. sa Barangay San Roque ngadto sa CSCR nga bahin sa San Isidro; ug F. Bas Street nga motabok sa Barangay Mohon, Linao ug Lawaan 2.

Matod ni Tumulak nga hinayhinay nilang ablihan ang mga apektadong karsada sa higayon nga magtapok na sa main venue sa Barangay Lawaan 2 ang mga misalmot sa torch run.

“We won’t close any roads but we will try to manage if the traffic becomes bumper to bumper. If the traffic results to a standstill, we will divert the traffic if necessary,” dugang ni Tumulak.

Ang hepe sa CTTODA niingon nga 150 ka traffic enforcers ang ilang ipakatap, 75 ka police personnel ug 30 ka personnel sa Talisay City Disaster Risk Reduction and Management Office (TCDRRMO) ang ipakatap sab aron motabang sa pagdumala sa trapiko atol sa rally.

Ang mga tanod sa 22 ka mga barangay sa dakbayan moabag usab sa pagdumala sa trapiko sa ilang mga lugar, dugang ni Tumulak.