Trabaho pagka pulis, personal nga kinabuhi, relasiyon sa iyang asawa nga si Yvonne, negusyo ug pulitika maoy mga motibo nga gitan-aw sa Cebu City Police Office (CCPO) sa pag-ambush kang Police Lt. Colonel Chuck Barandog ug sa iyang asawa sa alas 10 sa Dominggo sa gabii, Mayo 1, 2022.
Si Barandog naa pa sa talandugon nga kahimtang samtang si Yvonne stable ang kondisiyon.
Matod ni Police Lieutenant Colonel Maria Theresa Macatangay, information officer sa CCPO, nga sa maong mga anggulo, ilang gihimug-atan ang personal, trabaho ug negusyo sa biktima bisan kon kandidato sa party-list ang asawa niini.
“Work related, personal, iyahang relationships, kana ug sa politics. We’re also looking into that and many more. Daghan kaayo, complex ang maong hitabo. Ang atoa lang nga gitrabaho karon ang i-trace nato kon asa ug kinsa ning mga assailants and hopefully it will lead us or the circumstantial evidence will lead us to them,” matod ni Macatangay.
Gituohan nila nga ang target sa mga killer mao si Barandog base sa makita nga agi sa mga pinusilan ug way labot niini ang iyang asawa.
Ang mga agi sa pinusilan puro naa sa windshield sa driver’s side, diin upat ang nakita sa Superbalita Cebu.
Sila si Barandog ug Yvone Cania-Barandog gibanhigan sa riding in tandem sa dalan Pope John Paul ll, eskina F. Cabahug St. sa Barangay Mabolo, Siyudad sa Sugbo.
Ang magtiayon gikan sa usa kalihukan sa siyudad sa Mandaue ug gitakda na unta nga mamauli sa ilang balay sa Barangay Kalunasan.
Sakay ang magtiayong Barandog sa puti nga Hi-Lux nga Toyota pick up nga adunay marka nga STL party-list sanglit si Yvone 1st nominee alang sa umaabot nga piniliay sa Mayo 9, 2022.
WA MAKABAWOS
Matod ni Macatangay nga ila nang nahinabi ang pulis nga sakay usab sa maong sakyanan nga nibutyag nga nagsubay sila sa Pope John Paul ll Avenue apan sa pag- abot sa eskina F. Cabahug, nihunong sila kay stop signal.
Adunay naabot nga motorsiklo nga giluwanan sa duha ka mga tawo ug namusil sa makadaghang mga higayon tumong sa driver’s side sa sakyanan.
Si Yvonne dali nga nigawas sa sakyanan samtang si Barandog nikamang pa sa luyong lingkuranan nga samaran na sa bukton, kamot ug tiyan.
Wala na makabawos sa pagpusil si Barandog lakip na ang laing pulis nga sakay tungod sa kakalit sa hitabo. Nasamad usab ang mata sa pulis.
Dali nga nisibat ang mga gunman sa wala matino nga direksiyon samtang si Barandog nangayo og pakitabang nga madalag dali sa labing duol nga tambalanan.
Usa ka tinubdan niingon nga bisan samaron, giaswat ni Barandog ang iyang asawa sakay sa taxi.
Sigun ni Macatangay nga nakaangkon og 11 ka mga samad pinusilan (di unom suma sa unang taho) si Barandog sa lawas diin ang labing daghan naa sa bukton ug kamot.
Si Yvonne naigo sa wang bahin sa iyang back ribs ug paa, apan giingong stable na ang kahimtang.
Wa pa matino kon unsa nga matang sa armas ang gigamit sa mga gunman, apan gituohan nga short firearm kon basehan ang mga basiyo sa bala sa crime scene.
SITG
Nag-umol na ang CCPO og Special Investigation Task Group (SITG) nga pangulohan sa Mabolo Police Station, City Investigation and Detective Management Branch, PNP Crime Laboratory ug Criminal Investigation and Detection Group (CIDG 7) nga maoy motutuk sa imbestigasyon.
Matod ni Macatangay nga gipangsubay na nila karon ang mga gipangmuntar nga closed circuit television (CCTV) sa dapit ug mo back track sila sa gisubay nga dalan sa mga biktima.
Gibutyag ni Macatangay nga si Barandog girelibuhan sa katungdanan isip hepe sa City Mobile Force Company sa CCPO ug gibalhin sa Personnel Holding Admin Unit sa Camp Crame duha ka semana na ang nakalabay sa wala matino nga hinungdan.
Wa pa usab nila masayri kon nganong naa pa sa Sugbo si Barandog.
Si Police Brigadier General Roque Eduardo Vega, hepe sa kapulisan sa Central Visayas, nimando sa director sa CCPO sa paglusad og subsub nga imbestigasyon alang sa posibling pag-ila sa mga gunman ug masayran ang motorsiklo nga gigamit.
“Titignan natin lahat ng posibleng anggulo sa nangyaring pamamaril kung ito ba ay election-related incident o work-related ba considering na tumatakbo as party list representative ang asawa. We condemn this act of violence that should be resolved immediately,” matod ni Vega.
Samtang si Cebu City Mayor Michael Rama nimando sa CCPO sa paspas ug lawom nga imbestigasiyon sa kaso.
“I have already directed in my pronouncement that our police force should be dispatched, going to the bottom and bring justice and identify the perpetrators,” matod ni Rama.
Matod ni Rama nga kinahanglan nga paspasan ang imbestigasiyon kay naa na ang Siyudad sa hingpit nga pagpangandam sa eleksiyon sa Mayo 9.
Nagtuo si Rama nga way kalabutan sa pulitika ang ambush sa magtiayon.
I am more positive that we Cebuanos and even candidates we have never been known into wanting to create (election-related) violence," dugang ni Rama.
Bisan ang kapulisan niingon nga way labot sa pulitika ang ambush.