“PARA karetang magpaynturu karing memalen lilili na la, at ding lilili na meyakmul la.” – Isayas | Dangka 9: Sunis 16 (Isaiah 9:16)
“Dapot ding Eyiptu tau la, e la Dyos; ding kabayu da laman la; e diwa. Kanitang ing ding kabayu da laman la, e diwa. Kabud ing Ginu yapse na la ding gamat, ing talasaup mibagsak ya, at alang karing susopan na manabu; mabating lang agnan-agnan.” – Isayas | Dangka 31: Sunis 3 (Isaiah 31:3)
“Lunus kekayu, bulag a paynturu! Ngamu, ‘Nung ninu mang mamaryus kapamilatan ning pisamban, alang kabaldugan iti, dapot nung ninu mang mamaryus kapamilatan ning gintu ning pisamban, makagapus ya king pengaku na.” – Mateu | Dangka 23: Sunis 16 (Matthew 23:16)
“Ikayung bulag a paynturu! Darayas ye ing yamuk dapot yakmul me ing kamelyu. I Yesus sinabi ya namang malalam a pamangamanu: “Agyu nang paynturu ning bulag king kalupa nang bulag?’ E la agnan manabu king talaga?” – Mateu | Dangka 23: Sunis 24 (Matthew 23:24)
“Inya pin, ing ninu man dapat yang kimut alang pangasuglung karing bunga da ring kararaptanan; dapat kimut ya anting pauli ning tungkulan; uli ning ing gugusal alang pangagapus, ing ninu man darasnan ne ing Kakataskatasan. Agyang ding aring mengari kari Dyanak at aliwang disnan da ing katas ning kapantasan kapamilstan ning pamanupad karing mitutuk a tungkulan. Inya pin, para mu man king pamanuru karing laganas a maluka, dapat mung tuparan ing gagawan mu. Nanu mang dapat a gimpanan ning metung a budning tau, ding maluka tutukyan de takbang. At nanu mang pamantayan ing tatalatag na kapamiltan ding dapat a mapanalimbawa, pagdulapan na naman ning laganas a labwad.” -- Dalit ning Kakataskatasang Panginwan | Dangka 3, Sunis 19-21 (The Song of God¦3:19-21)
***
Makapanaun ing atin tamung sukat pilinan at sukat talukyan. Miyayaliwang tau, miyayaliwang pipilinan at miyayaliwang tatalukyan-miyayaliwang sangkan-mababo man o malalam.
Nung ika pinili meng talukyan ing alang kegiwan at ing tatalukyan mu kabud ya pin ing panamdam mu at ditak o ala man makagyu at mabinit a pamangamit king isip-mekad ating mali king pamagpasya mu. Selang-alang mu na la wari ding miyayaliwang patune agpang karing karapatdapat a talukyang dalerayan ning makatud at matinung pamamili?
Mekad mengapatuki ka mu karing kakaluguran mu uling keraklan karela o ila ngan atin lang buri at mangapatuki ka karela uling dakal la, inya mesaul ka keng keraklan karela-keng bilang da. Marine ka nung e mu apusan nung nanu ing pinili dang talukyan. Tatakut ka o migaganaka ka a mekad e da na kaburyanang akayabe pa nung e mu la pagkyabayan keng kaburyan da. Makatud namang talukyan la kaburyan. Mu pin, ita kaya ing makatud? Ita kaya ing matinu?
Mekad deng pengari mu atin lang tatalukyan kanitang milabas a panaun inya ita mu naman at mekad mu naman atin lang mayap a sangkan kanita uling mekasaup ya karela nung ninu man ing telukyan da. Mekakayap ya karela at king pangsarili dang kasangkanan. Mikautang la lub uling mikakapanintunan la o panakitan a pekinabangnan dang masalese. Ala na ngeni ita inya buri da mibalik na naman. Buri dang takman pasibayu ing nebangnan da kanita.
Mekad meniwala ka keng e tutung balitang menibat keng social media uling asno katarling siwala deng “mamalita” o manalili king katutwan a malambat nang milabas at pakikwanan dang alilan deng mekinabang king panaun ayta. Mamayaran la ngeni bang mibaligtad ing katutwan at magi nang kalaraman a palto dang katutwan.
Mekad ing kapalsinta mu o asawa mu ing bisang pataluki keng buri mung maging punbangsa. Aru...masulit pangilagan ita nung e mu balu ing sabyan mu kayang katuliran king apili mung talukyan.
Mekad!
***
Dake Talabaldugan:
1. milalamlaman (pangdiwa) adwa o migit pang mipaglamlam o magi malamlam paglalawe o pamipaglalawe king o karing balang metung. English – staring at each other sadly, indifferently, nonchalantly or inauspiciously. Alimbawa king pamangamit: “Pauli ning e la pareu apili keng alalan milalamlaman la paglalawe king balang metung deng mikakaluguran manibat inyang milabas a bulan.”
2. milalamnaman (pangdiwa) midirinang laman; bubuktut. English – getting being filled up; capability of getting pregnant. Alimbawa king pamangamit: “E pa man megisan lubusan, milalamnaman ne naman uling e ne buring alang laman agyang saguli mu ing palabyasang Apung Tasi.”
3. milalampasan (pangdiwa) milalagpusan; matatagal; mitatawli. English – getting overtaken; losing in the running race or competition. Alimbawa king pamangamit: “Neng metwa ne rugu at mebagal, milalampasan ne kareng sadyang sasambutan nang anak-anak pa kanita i Lydia.”
4. milalampungan (pangdiwa) milalanding pusa. English – cats making some mating sounds. Alimbawa king pamangamit: “Asna ke kapuyatan keng pibalebale mi neng deng pusang sese da reng siping bale ala lang patugut milalampungan nabengi.”
5. milalampinan (pangdiwa) mipapasuluran lampin; makapaglampin, mikakalampin. English – being able to wear or use diapers. Alimbawa king pamangamit: “E na kapad ning bingut ing milalampinan neng anti ngening anti kanini kalisangan at manimawas ya.”
***
Mikasing-kabaldugang amanu tamu
1. bumbung – takap buntuk dapot magagamit mu naman keng katawan o mabilug a katawan.
2. talukbung – lakwas malating panakap lupa at buntuk.
3. kulubut – pamanakap king katawan gamit maralas ing ulas, maragul a tela o tibabal.
4. Pampan – panakap king nanu mang bage bang e mayakit o makilala nung tau ya ing susulud.
5. Takap – panyaklub, mengari king patulapit a magagamit king pamanyara king boti o garapa o garapun.
6. Taklub – saklub mu naman; kasangkapan a panakap keng pamangan maralas, dapot malyari mu namang magamit king aliwang sangkan.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king "garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.