Trabahante nga gituohang giurom, baho na nga napalgan sa iyang mga kauban sa giabangang balay sa alas 8:20 sa buntag, Martes, Mayo 3, sa Sitio Upper Segra, Brgy. Buanoy, lungsod sa Balamban.
Si Alfer Ruaya, hingkod, trabahante sa Tsuneishi Heavy Industries Inc., taga Brgy. Cogon, Tuburan nakaplagang nagkadugta na ang lawas.
Si Police Staff Sgt. Alby Agua, imbestigator sa Balamban Police Station nga nahinabi sa Superbalita Cebu, niingong nanimaho ang lawak ni Ruaya. Sumala sa iyang mga kauban sa trabaho nga Dominggo sa buntag katapusang nakit-an si Ruaya.
Nahibulong sila nga kalit nga nawala. Gisigihan nila og tuktok ang pultahan sa kwarto apan walay nitubag.
Kagahapon sayo buntag, ang iyang mga kauban nakapanimaho sa lang-og kaayong baho gikan sa iyang lawak ug pag-abli sa pultahan, nakit-an siyang patay na.