Usa ka siyudad sa lalawigan sa Sugbo ang gipaubos na sa Alert Level 1 sugod sa Mayo 3 hangtod sa Mayo 15, 2022.
Ang dakbayan sa Talisay nalakip na sa listahan sa Inter-Agency Task Force for the Management of Emerging Infectious Diseases (IATF-MEID) nga gipaubos sa mas luag nga restriction sa nagpadayong pandemya sa coronavirus disease (Covid-19).
Subay sa IATF Resolution No. 165 , nalakip sa basehan aron tugutan nga mopaubos ang usa ka lugar sa Alert Level 1 mao ang low risk total bed utilization rate, kinahanglan usab nga makab-ot niini ang 70 porsiyento nga vaccination rate ingon man ang full vaccination nga 70 porsyento sa priority group sama sa mga senior citizen.
Matod ni Dr. Mary Jean Loreche, chief pathologist sa Department of Health (DOH 7), nga ang siyudad sa Talisay nakatuman na sa gipangayo sa IATF aron hingpit nga mapaubos sa mas ubos nga alert level.
“Talisay has complied with the required fully vaccinated eligible population and the senior citizens that’s why alert level 1 sila,”matod ni Loreche sa Mayo 3, 2022.
Base sa uwahing datos sa kagamhanan sa Abril 30, wala na’y natala nga aktibong kaso sa Covid-19 ang siyudad.
Sukad niadtong Marso, ang tri-cities lang sa Sugbo ang naa sa Alert Level 1 tungod kay ang ubang mga dapit sa isla sa Sugbo ubos kaayo og vaccination rate. Gani, ang Lalawigan sa Sugbo usa sa mga probinsiya sa nasod nga ubos og vaccination rate.
Lakip na niini ang Bohol og Negros Oriental, kansang vaccination rate batok sa Covid-19 ubos sa 70 porsiyento sa Mayo 1, 2022, matod sa National Task Force (NTF) Against Covid-19. (ANV, LMY)