Anggulo sa pulitika sa pag-ambush sa magtiayong Police Lieutenant Colonel Chuck ug Yvonne Barandog gisalikway na sa kapulisan sa siyudad sa Sugbo.
Nakita sa mga imbestigador nga di election related ang insidente. Matod ni Police Lieutenant Colonel Maria Theresa Macatangay, information officer sa Cebu City Police Office (CCPO), nga sa pagkakaron nakatutok na sila sa trabaho ni Barandog isip police official nga posibling dunay nasuko kaniya.
Gisalikway nila ang pulitika bisan kon si Yvonne mao ang first nominee sa STL party-list.Ilang pangsubayon ang mga dagkong police operation nga gilusad ni Barandog nga magdugtong sa ilang imbestigasyon nga posibling maoy hinungdan sa krimen.
“Mao na karon ang atoang gina collate kon asa siya na assign before, unsa nga mga dagko nga operation conducted. Ato na nga gihimayhimay, gitagsa-tagsa og tan-aw who among those might have the mechanism or have the motive to do this particular crime,” matod ni Macatangay.
Dugang ni Macatangay nga sa pagkakaron di sila morekomendar sa Commission on Elections (Comelec) nga ipaubos sa election watchlist areas ang tibuok siyudad sa Sugbo tungod lang sa insidente.
Moduso na sila og progress report ngadto sa Directorate for Investigation and Detective Management (DIDM) sa Camp Crame labot sa kalamboan sa ilang imbestigasyon sanglit gihulat kini sa PNP Chief.
Ilang gipangsubay ang gipangmontar nga mga CCTV camera duol sa dapit nga nahitaboan, apan nasagmuyo sila sa dihang ilang nasuta nga kadaghanan sa mga CCTV dili mo function o display lang sa karsada.
Dugang ni Macatangay nga ang gihimo karon sa mga sakop sa SITG mao ang pag back track sa giagian sa magtiayon kon diin sila gikan.Dako unta og matabang sa ilang imbestigasyon ang mga CCTV sa daplin sa karsada kon nag-function pa.
Adunay dash camera ang sakyanan ni Barandog nga gitan-aw na sa SITG, diin aduna silay nakita nga naay mga sakyanan nga nakasunod nga posibling adunay mga camera nga maklaro ang hulagway sa mga gunman.
Gituohan sa kapulisan nga gawas sa usa ka motor sa riding in tandem nga nagsunod sa magtiayon, duna pay mga kauban nga naa sa palibot isip mga back up nga mao karon ang susihon sa SITG.
Sa pagkutlo ning balita, padayon pa nga giobserbahan sa mga doktor si Barandog naoperahan aron kuhaon ang bala nga naa sa iyang lawas.
Operahan pa siya og balik aron kuhaon ang laing bala nga naa sa iyang tiyan. Si Yvonne operahanan, apan obserbahan usab kay ang bala niungot duol sa spinal cord.