Kapulisan sa dakbayan sa Sugbo magpaabot una sa pormal nga kamandoan gikan sa Camp Crame mahitungod sa operasiyon sa mga online sabong kun e-sabong human nimando na si Presidente Rodrigo Duterte nga ipaundang na ang maong matang sa sugal.

Matod ni Police Lieutenant Colonel Maria Theresa Macatangay, information officer sa Cebu City Police Office (CCPO), nga nagkinahanglan sila sa suwat kamandoan aron hingpit nga ikaimplementar ang pagpahunong sa e-sabong sa Cebu City.

Nibahad si Macatangay nga kon aduna nay pormal nga order nga ilang madawat, dili sila magpanuko sa pagpatuman ug kadtong mopadayon sa ilang operasiyon ang dakpon lakip na kadtong mga nanugal.

Mamahimo hinuon nga ang lokal nga Kagamhanan sa Siyudad sa Sugbo makaluwat og kamandoan sa pagpasira sa mga online sabongan ilabi niadtong nakalukat og business permit.

“Well kon wala na na sila ana nga franchise, totally gi cancel na na, it will render their activities illegal, so panakpon gyud sila tanan,” matod ni Macatangay.

Gumikan niini, gipanglantawan karon sa kapulisan sa siyudad nga mosiaw na usab ang mga tigbakay ug posibleng adunay sunodsunod nga mga pagpangronda nga ipatuman sa CCPO.

Iyang gipasabot nga walay problema kon nagpaaway lang og manok ang mga tawo nga walay pusta apan kon mahibaw-an nga nagpustaanay, mahulog kini nga ilegal ug mahitabo ang pagpanakop.

Awhag sa kapulisan sa publiko nga likayan ang pagpanugal sa tigbakay sanglit dili sila mopasaylo kon madakpan.