Nipagawas og kamanduan si Presidente Rodrigo Duterte niadtong Lunes, Mayo 2 sa pagpahunong sa operasiyon sa e-sabong, base sa rekomindasyon sa Department of the Interior and Local Government (DILG).
Nagkanayon ang Presidente atol sa iyang “Talk to the People Address” niadtong Lunes nga ang kalihim sa DILG Eduardo Año nirekomindar sa pag-undang sa operasiyon sa e-sabong base sa resulta sa gihimong survey ug mga taho gikan sa nagkadaiyang mga tinubdan.
“The recommendation of Secretary Año is to do away with e-sabong... So, since it’s his recommendation and I agreed with it and it’s good, so e-sabong will end by tonight (Monday night),” matod ni Duterte.
Gitahasan sab sa Presidente si Año nga mopahigayon og survey aron masuta ang social impact sa ‘e-sabong’ human nga ubay-ubay ang mga reklamo nga nadawat gikan sa publiko mahitungod sa maong sugal.
DAKOG BUHIS
“So ginawa ni Sec. Año yung trabaho nya and he reported and validated yung naririnig ko. Yung amin naman sana, buwis lang ang hinabol namin rito, P640 million is P640 million,” butyag ni Duterte.
Sa sayo pa, adunay mga panawagan sa pagpahunong sa e-sabong sayo ning tuiga ilabi na niadtong pagka-missing sa kapin 30 ka mga sabongero.
Tungod sa hitabo, ang Senate Committee on Public Order and Dangerous Drugs niduso og resolusyon niadtong Pebrero nga nag-awhag sa Presidente sa pagsuspenso sa operasyon sa ‘e-sabong’samtang gisusi pa ang kasong pagka-wala sa 34 ka mga sabongero.
Gimandoan ni Duterte ang Philippine National Police ug National Bureau of Investigation sa pagpahigayon og imbestigasyon sa maong mga na-missing.
WA UNA GIHUNONG
Niadtong Marso nipasabot ang Presidente kon nganong wa gilayon siya mopahunong sa e-sabong tungod kay nakakuwarta ang kagamhanan gikan sa maong operasiyon nga moabot og P640 milyones matag buwan.
Nipasabot sab ang chairperson sa Philippine Amusement and Gaming Corporation (Pagcor) Andrea Dominggo nga nagduha-duha ang ilang ahensiya sa pagpahunong base sa nauna nga rekomindasyon, gumikan sa ilang pagkahinugon sa kitaon sa kagamhanan.
Apan karong bag-o, nakahukom si Duterte sa pagpaundang niini gumikan sa nagkagrabe na nga mga reklamo nga nadawat ug ang dautang epekto niini ngadto sa mga pamilya niadtong ilang banay nga nabuang sa e-sabong.
“Eh ang labas di na natutulog yung sabungero 24 hours. I leave it to Sec. Año to impose it because the PNP is under the DILG...It is immediate,” dugang pa sa Presidente.
MOHANGYO
Opisyal sa usa ka rehistrado nga local e-sabong company nagtinguha sa pag-apelar kang Presidente Duterte sa pagkonsiderar sa pagpasuspenso sa operasyon sa online sabong.
Nagkanayon si Atty. Daniel Francis Arguerdo, legal counsel sa Highland Amusement Center, affiliated sa Pitmasters Live brand, nga ang pagpasuspenso sa e-sabong makaapekto ngadto sa kapin kun kulang 200 ka mga teller nga nanarbaho sa 19 ka outlets sa Dakbayan sa Sugbo.
Si Arguerdo nakigtagbo sa mga outlet teller sa usa ka mall sa dakbayan diin ilang gihisgutan ang pagpasira sa maong operasiyon.
Sila nanghinaot nga hatagan og konsiderasyon sa Presidente ang ilang hangyo aron nga makapadayon sila sa ilang panginabuhian.
Matod pa ni Arguedo nga ang ilang management ang kasamtangan nga nakig-alayon sa nasudnong kagamhanan sa pagpabalik sa online sabong operation bugti nga ilang pamub-an ang ilang operating hours. (FVQ, EHP, SunStar Philippines)