Samtang busy na karon ang showbiz sa kampanya alang sa gisuportahan nilang mga kandidato apan katingad-an nga dunay mga dagkong personalidad ang mas gipiling magpakahilom. Unsa kahay rason? Undecided o playing safe lang? Atong suwayan og kalkal ang ilang mga isyu aron makitang katag. Aber!

BAMBOO MAÑALAC / INSTAGRAM Sa 2013 interbyu sa ABS-CBN News nanganti ang rock star nga si Bamboo nga bisan magkinaunsa dili siya mo-endorso og kandidato. Apan nganong naa man siya sa kick-off party sa usa ka mayoral candidate sa Bacolod niadtong Marso? Basin diay igo ra siya ni-perform, no!?

LEA SALONGA / HKPHIL.ORG Nag-viral niadto ang litrato nilang Lea ug VP Leni sa social media. Duna say nigawas nga ni-comment si Lea sa official Facebook page ni Leni nga, “Safe, travel always.” Ang makapaintriga ang screenshot nga nagpakita nga si VP Leni ang gibotaran ni Lea sa 2016 elections. “Secret Kakampink” ba ang broadway star?

MARIAN RIVERA UG DINGDONG DANTES / INSTAGRAM Hmmm... mao kunong hilum ang magtiayong Marian Rivera ug Dingdong Dantes nga mopublikar sa ilang kandidato tungod kay kabahin sila sa dagway sa GMA public affairs election advocacy nga “Dapat Totoo.” Apan daghan ang nakurat nga usa si Marian sa mga ningtan-aw sa livestream sa grand rally ni VP Leni Robredo ug Kiko Pangilinan sa Cavite. Kakampink ba si Marian?

AIZA SEGUERRA UG LIZA DIÑO / INSTAGRAM Kon unsa sila ka saba sa kandidatura ni Rody Duterte niadto ingon ana sab sila kahilum karon. Ang magtiayong Liza Diño ug Aiza Seguerra ang lakip sa gihatagan og posisyon ni Duterte sa gobyerno isip bugti sa ilang pagtabang niya. Ang papa ni Diño gi-appoint usab nga DILG undersecretary. Apan nganong wala silay kisaw karon?

JOHN LLOYD CRUZ / FACEBOOK Kahibawo ta nga Duterte supporter si John Lloyd sa miaging 2016 elections. Apan nganong hilum man siya karon? Hinuon niadtong Easter Sunday iyang giubanan ang iyang suod nga higalang si Simon Romulo Tantoco nga nag-house-to-house campaign sa Pasig nga nilansar sa pagkakonsehal sa partido ni Mayor Vico Sotto.

AGA MUHLACH / FACEBOOK Nagsul-ob og red polo shirt si Aga Muhlach atol sa guesting niya sa talk show ni Cristy Fermin nga maoy kolor sa UniTeam. “Nagsuot lang ako kasi mago-golf ako after,” depensa pa ni Aga sa maong interbyu nga gituohang usa sab ka secret BBM-Sara supporter. Si Aga ang usa sa mga ningdapig ni Toni Gonzaga dihang gi-bash ni sa iyang pag-host sa proclamation rally sa UniTeam.

MARTIN NIEVERA / INSTAGRAM In fairness bisan sa una pa ang concert king wa gyud mag-apil-apil sa bisan unsang kalihukan sa pulitika. Ang bugtong higayon nga nakataak siya sa Malacañang dihang niapil ra siya sa Palace briefing niadtong 2018 tungod sa iyang bag-ong show.

SARAH GERONIMO / FACEBOOK Dugay nang gipistahan sa mga basher si Sarah G tungod sa iyang pagpakahilom sa ABS-CBN franchise renewal. “Plus she married a DDS pa,” birada sa iyang mga kritiko. Niadtong Pebrero usa si Sarah sa giingon sa brodkaster nga si Jay Sonza nga (secret) BBM-Sara supporter. Apan kever lang ang Sarah. Sa 2010 presidential election si Sarah ang celebrity endorser ni Manny Villar nga naparot.