Nawad-an og laing world boxing title ang Pilipinas sa dihang gitangtangan sa World Boxing Organization (WBO) si John Riel Casimero sa iyang bantamweight title tungod sa kapakyas niini sa pagpakigsangka sa challenger nga si Paul Butler sulod sa duha ka mga higayon.
Sa gipagawas nga pamahayag niadtong Lunes, ang WBO nagkanayon nga ilang gihangop ang rekomendasiyon sa World Championship Committee nga kuhaan sa bakos si Casimero ug isaka ang Englishman nga si Butler ngadto sa usa na ka full champion.
Sa mao gihapong resolution, ang WBO miuyon usab sa rekomendasiyon sa championship committee nga ibutang si Casimero isip no. 1 contender sa maong division.
“The Committee unanimously recommended to the WBO Executive Committee to strip John Riel Casimero’s WBO World Bantamweight Championship Title for failure to comply with the conditions set forth in its “Resolution,” pamahayag ni Luis Batista-Salas, WBO Championship Committee chairman, nga napatik sa www.boxingscene.com.
“The WBO Executive Committee unanimously voted in favor of adopting the WBO Championship Committee’s recommendation and therefore declares the WBO Bantamweight Championship Title “Vacant.”
Si Butler, kinsa miangkon sa interim bantamweight title pinaagi desisiyon nga kadaugan batok sa gipuli sa puwesto ni Casimero niadtong Abril 22 nga away nga si Jonas Sultan, gisaka ngadto sa full champion nga estado.
Sa nasayran, si Casimero wa makaaway sa challenger niini nga si Butler niadtong Abril 23, 2022 human nga ang British Boxing Board of Council (BBBofC) mialegar ni Casimero nga migamit kini og sauna bath aron sa pagtibhang sa gibug-aton niini.
Gipasabot sa BBBofC nga usa kini ka dakong kalapasan ubos sa ilang lagda.
Ang kampo ni Casimero niingon nga wa sila masayod sa polisiya sa Britanya kalabot sa sauna. Nakuha usab ang hustong timbang.
Gumikan sa nahitabo, ang laing Pinoy fighter nga si Jonas Sultan maoy gihulip ni Casimero alang sa interim world title.
Napildi si Sultan pinaagi sa unanimous decision.
Niadtong Disyembre, una nang gikatakda ang Casimero-Butler fight apan wa kini mahinayon gumikan kay nagkasakit ang Filipino fighter niadtong higayona.