Unom sa matag 10 ka indibiduwal ang gustong hunungon ang “e-sabong” (online cockfight betting) operations, base sa survey nga gihimo sa Department of the Interior and Local Government (DILG).
Si DILG Secretary Eduardo Año niingon nga sa online survey nga gihimo niadtong Abril 19 hangtod 20, 62 porsiyento sa kinatibuk-ang 8,463 ka respondents ningbotar batok sa e-sabong operations, samtang 34 porsiyento ang gusto nga magpadayon kini apan adunay mas hugot nga regulasiyon, ug upat lang ka porsiyento ang nagpahayag nga hingpit nga nagsuporta niini.
Matod niya nga ang respondents mao ang mga tawo nga nalambigit sa e-sabong, ahente, empleyado, mamustahay, ug dili partisipante o dili mamustahay apan may kalabutan o kaila sa maong mga indibidwal sa tibuok nasud.
Ang gitumbok nga rason sa respondents sa pagsupak sa e-sabong naglakip sa bisyo sa sugal, pagkabangkarota sa mga magduduwa, pagkalubong sa utang, gasto sa pamilya, pagpabaya sa trabaho ug pagtuon, ug krimen.
Si Año niingon nga mao kini ang basehanan sa ilang rekomendasiyon ngadto kang Presidente Rodrigo Duterte kinsa nimatuod ug nimando sa “dinalian” nga pagsuspenso sa mga operasiyon sa e-sabong niadtong Martes, Mayo 3, 2022.
“This decision is rooted in a survey reflecting the sentiment of the people. Hindi ito bara-bara na desisyon,” matod niya.
Ang kalihim niingon nga ang pagsuspenso sa e-sabong mahimong epektibo “until a better set of framework and regulations are formulated, in such a way that it will not significantly harm any of the stakeholders and lead to the moral decay of society.”
Si Año niingon nga nihatag na siya og instruksiyon sa Philippine National Police (PNP) alang sa pagpatuman sa mando ni Duterte. Ang hepe sa PNP Public Information Office nga si Brigadier General Roderick Alba niingon nga ang PNP mopalihok sa ilang information drive aron sa paggiya sa ilang mga sakop bahin sa kamanduan.
“If it will entail a crackdown on all persons operating online cockfighting, then we will do our job in enforcing what needs to be done,” siya niingon.