Nag-videoke gipusil sa silingan nga wa kaaguwanta

Talandugon ang kahimtang sa usa ka ulitawo human siya pusila sa makadaghan sa ilang silingan nga giingong iyang gibugalbugalan samtang siya nagkanta sa videoke alas 10:20 sa gabii sa Martes, Mayo 3, 2022 sa Purok Kamunggay, Teeners, Brgy. Tuyan, dakbayan sa Naga, habagatang Sugbo.

Si Jerome Amit Padillo, 31, ulitawo, nagpuyo sa nahisgutang lugar nalandig sa tambalanan human nakaangkog samad pinusilan sa kalawasan.

Si Jeffrey Repollo Saladaga, 26, dunay kapuyo, technician sa usa ka telco, nitahan sa kapulisan sa dakbayan sa Naga human sa kremin.

Si Police Senior Master Sgt. Jake Catane, imbestigator sa Naga Police Station nga nahinabi sa Superbalita Cebu, nagkanayon nga si Padillo nagtagay ug nag-videoke sa ilang balay uban ang manghod nga lalaki ug duha ka mga ig-agaw.

Human sa pagkanta nila, nanghipos na sila kay mamahulay dihang kalit nga nibutho si Saladaga ug nipusil kang Padillo sa makadaghan.

Si Saladaga daling nisibat human sa kremin, apan boluntaryong ni-surrender sa kapulisan sa Dakbayan sa Talisay ug maoy nidala kaniya sa Naga Police Station.Si Padillo gidali sa pagdala sa tambalanan tungod sa mga samad.

Matud ni Catane nga ang biktima ug suspek ingon man ang ilang mga pamilya dugay nang nagkabangi sa yuta.

Ikaduha, nagkalalis sila kabahin sa kasaba sa videoke kon magkanta-kanta sila si Padillo ug mga kabanay.

Gibutyag niini nga nagsige na sila og reklamo kabahin sa kasaba sa videoke apan giingong sila si Padillo wa mopatuo.

“Napuno na daw siya kay i-bully sila permi unya bisan unsay kantahon, magsige’g bugalbugal, saba kaayo. Sa kalagot gipusil niya ang biktima,” dugang ni Catane.

Si Saladaga nipasangil nga giguba ni Padillo ang pultahan sa kusina sa ilang balay.

Giingong gitulisok ni Padillo ang inahan ni Saladaga hinungdan nga wala na niya maagwanta ang pagtamay.

Giandam na sa kapulisan ang tukmang kasong ipasaka batok kang Saladaga.