Mga imbestigador sa Special Investigation Task Group (SITG) Barandog nagtagbo alang sa case conference aron ipresentar ang ilang mga ebedensiya nga nakuha nga posibling makahatag og lead sa kasulbaran sa pag ambush sa magtiayong Police Lieutenant Colonel Chuck Barandog ug Yvonne niadtong Dominggo sa gabii, Mayo 1, 2022.

Wa pa silay bisan usa ka suspek nga matumbok.

Matod ni Police Lieutenant Colonel Wilbert Parilla, deputy director for operations sa Cebu City Police Office (CCPO) nga sa maong case conference mahibaw-an kon asa na sila sa ilang imbestigasyon.

Iyang gibutyag nga ang mga imbestigador sa Criminal Investigation and Detection Group (CIDG 7) lakip na ang Scene of the Crime Operations (SOCO) nga mopakita sa ilang nakuha nga ebedensiya nga makatabang sa kasulbaran sa krimen.

“Ang Soco ug CIDG will present all the evidence they have so that ato ning matipon for the purpose of determining the suspect,” matod ni Parilla.

Giangkon ni Parilla nga sa pagkakaron wala pa silay gitumbok nga mga suspek o persons of interest tungod kay padayon pa ang ilang pag tigum sa mga ebedensiya.

Gitinguha nila nga mapadali ang kasulbaran sa krimen nunot sa kamandoan ni PNP Chief Police General Dionardo Carlos.

Niadtong miaging adlaw, gipahibawo ang kapulisan sa siyudad sa Sugbo nga gipaubos sa operation si Barandog aron makuha kadtong mga bala nga niungot pa sa lawas niini.

Giingong naa pa kini sa talandugon nga kahimtang apan gihulagway nga wala ma-comatose ang police official.