Veco andam na sa eleksiyon

Visayan Electric (VECO) nangandam sa posibleng mga kakulian sa supply sa kuryente sa Probinsya sa Sugbo atol sa piniliay sa Mayo 9, 2022.

Gipangandaman sa Veco ang pagbutang og mga standby crew, pagsusi sa mga classroom isip polling precincts aron matubag ang mga kakulian nga posible unyang masugatan atol sa pagbotar na sa mga Sugboanon sa probinsya. Kini maoy gipahibawo ni Queenie Bronce, tigpamaba sa Veco sa Mayo 4, 2022.

Human sa kadaot nga dala sa Bagyong Odette, ilabi na sa supply sa kuryente sa Sugbo, gisubli pagsusi sa kompaniya ang mga lugar nga gikinahanglang mabalikan na sa kuryente sa dili pa ang piniliay sa Lunes.

“Amo na gi pa-check gikan San Fernando paingon sa Liloan...as tabang namo para sa preparations sa elections, giapil na namo. Among gi-invite ang mga accredited electricians unya ilang gipangtan-aw ug gi-check ang mga eskwelahan nga sa lista sa Deped (Department of Education) gamiton as polling precincts...katong naay mga minor repairs magkinahanglan og suga, mga switches ang Visayan Electric ang ni provide,”matod ni Bronce.

Gidugang niya nga gawas sa pagsusi, gisiguro usab nila kon duna bay mga standby generator ang tunghaan kon ugaling makasinati og power interruption ilabi na sa mga bukirang bahin sa probinsya.

“Gisiguro lang gyud namo nga aning mga canvassing centers kay mao man ni ang magdugay, polling places at least two days kay mag prepare. Nag survey na nuon mi naa silay standby generator,” asoy niya. Bisan pa niini, gipasabot ni Bronce nga ang gihimong pagpangandam dili garantiya nga way mahimong kakulian gumikan kay wala sila’y kontrol sa source sa ilang supply.

“Kon wala lang gyud problema sa supply from the transmission side ug generation...maka assure gyud mi nga naa gyuy power from the days before the election, during the election and days after sa election nga sige na og counting... Di man gud namo control ang transmission and generation side. Di ta parehas anang blackout gyud nga ang supply sa NGCP (National Grid Corporation of the Philippines) ang mawala, wala gyud mi mabuhat, pawong gyud ta,” dugang ni Bronce.