Dul-an sa duha ka libo ka mga police personnel ug mga sundawo, lakip na sa Philippine Coast Guard (PCG), gipadala sa mga probinsya sa Central Visayas alang sa paghatag og siguridad sa eleksiyon sa Lunes, Mayo 9, 2022.

Sa dul-an 2,000 ka personnel sa Philippine National Police (PNP) ug Armed Forces of the Philippines (AFP), ang 1,621 niini gikan sa Police Regional Office 7 (PRO) 7.

Ang 829 ipakakatap sa probinsya sa Bohol; 402 sa probinsya sa Sugbo; 172 sa Negros Oriental samtang 36 sa probinsya sa Siquijor.

Dunay standby reserve nga 182 nga maoy ipadala sa usa ka dapit nga manginahanglan og dugang pwersa.

Gawas sa dul-an duha ka libo ka mga personnel, gilakip usab sa pag-deploy ang mga patrol car, ambulansiya ug usa ka trak de karga sa PRO 7.

Ang augmentation personnel pormal nga gidawat sa regional director sa Commission on Elections nga si manlalaban Dennis Ausan.

Ningsaksi sa kalihukan sila si Dr. Salustiano Jimenez, regional director sa DepEd 7; Commodore Inocencio Rosario Jr, commander Coast Guard District Central Visayas; Colonel Jerry Borja , commander sa Joint Task Group Cebu; Police Colonel Antonietto Cañete, chief intel sa Area Police Command Visayas ug mga sakop sa PNP Defense Press Corps.

Matod ni Police Brigadier General Roque Eduardo Vega, hepe sa kapulisan sa Central Visayas, nga ang kinatibuk-ang pwersa sa kapulisan sa rehiyon ipakatap kay maoy mando ni PNP Chief Police General Dionardo Carlos.

Mando ni Vega sa iyang mga personnel nga buhaton lang nila ang ilang trabaho pinasubay sa balaod aron nga ang tanang botante makapili sa ilang gitinguha nga mangulo sa nasud.

“Good luck to all of you. Bear in mind that we play an important part in this significant and historic political exercise. Let us render the best service and to be steadfast now, adherence to promoting public trust and confidence to our citizens in our government that assures its people the absolute democratic governance by being professional and non-partisan at all times,” matod ni Vega.

Gitug-an ni Vega nga kapin sa 10,000 ka mga pulis mobantay sa eleksiyon sanglit ang tanang PNP personnel gimandoan nga human sila mobotar, sila mobantay sa ilang lugar kon asa sila nahimutang.