Anak niluba patay sa iyang inahan nga wa sa maayong pangisip alas 9 sa gabii sa Martes sa Sitio Dumlog, Brgy. Simala, lungsod sa Sibonga.

Ang anak niingon nga naluoy siyang nagsud-ong sa iyang inahan samtang maglagot siya sa iyang mga barkada nga manungog kaniya.

Ang biktima nga si Julieta Bacaltos, 51, nadiskobrehan sa iyang bana nga patay na mga alas 7:30 sa buntag sa Miyerkulis, Mayo 4, sulod sa ilang balay

Si Police Master Sgt. Gerardo Abad, imbestigator sa Sibonga Police Station nga nahinabi sa Superbalita Cebu, nagkanayon nga si Angelo Bacaltos, 19, grade 11, niangkon sa kremin mga alas 10:00 sa buntag atol sa ilang imbestigasiyon.

Matud pa ni Abad nga human nila gihimo ang pagsusi sa crime scene uban sa personnel sa Scene of the Crime Operations (Soco 7), nasuta nga walay timailhan nga dunay laing tawo nga nakasulod sa balay.

Wala nagkatag ang mga butang samtang wala say kwarta nga makawat sanglit masakiton sa pangisip si Julieta.

Una nilang gidudahan ang kapuyo nga si Allan Lariosa, 54, sanglit sila ra mang duha nagpuyo sa balay.

Ang ilang mga anak toa gipapuyo sa balay sa apuhan gumikan sa kahimtang pangisip sa ilang inahan.

Tungod niini, sila si Allan ug Bacaltos ilang giimbetar sa police station aron makuhaag dugang mga pamahayag.

Atol sa imbestigasiyon, si Bacaltos walay lipodlipod nga niangkon sa kremin.

Sumala ni Abad nga iyang gipangutana si Bacaltos kon nganong nakaako siya sa pagpatay sa iyang inahan.

Ang suspek nitubag nga dili na siya makaantos magtan-aw sa kahimtang sa iyang inahan kay bata pa lang sila, duna nay sakit sa pangisip ang ilang inahan.

“Naluoy na kaayo ko sa akong mama magtan-aw sa iyang kahimtang. Maglagot sab ko niya unya mauwaw ko sa sigeg sungog sa ako barkada kabahin niya,” kutlo ni Abad sa gisaysay sa gisulti sa anak.

Nianang pagkabuntag sa Martes, ang iyang inahan nakagawas sa ilang balay nga nagdala og bunal, nanggukod sa ilang mga silingan unya nangbato.

Aron mawala na ang pag-antos niini ug mga sungog sa iyang mga barkada ug silingan, nakahukom siya nga patyon ang iyang inahan.

GIPATAY

Nikuha siya og kutsilyo nga hapit usa ka ruler ang gitas-on ug pagkamingaw na sa palibot, iyang giadto ang ilang balay alas 9:00 sa gabii.

Ang iyang amahan nilakaw kay niadto og kalingawan. Mga alas 12 na sa tungang gabii sa Miyerkules nahiuli si Allan. Wa siya mosulod sa balay hangtod nianang buntag.

Matod ni Bacaltos nga nisulod siya sa kwarto samtang natulog ang iyang inahan.

Gihansakan niya sa makadagang mga higayon sa nagkadaiyang parte sa kalawasan hangtud namatay.

Nibalik siya sa balay sa ilang apuhan pipila ka metros ang gilay-on gikan sa ilang balay.

Iyang gilabay ang kutsilyo sa kadaruhan nga narekuber sa kapulisan human siya nitug-an.

Matud ni Abad nga ang apuhan sa suspek nibutyag nga nabantayan nila ang iyang apo nga nabalisa nianang gabii.

Wala kini makatarong sa pagkatulog hangtud na alas 12:00 sa gabii.

Wala sila magdahom nga mahimo niini ang kremin kay buotan si Bacaltos nga pagka anak.

Gani bisan sa kawad-on naningkamot nga makaeskwela.

KUNOHAY

Si Bacaltos nagpakaaron ingnon nga maghatod og pagkaon sa iyang inahan.

Nagsusi kini ngadto sa iyang inahan aron pagtago sa kremin, apan wa siya pasudla sa iyang amahan kay mao na lay motunol sa pagkaon sa ilang inahan.

Si Allan nanuktok sa ilang balay, apan ang iyang kapuyo wa gihapon nitubag.

Iyang gipugos sa pag-abli ang pultahan ug didto na niya nakit-an si Julieta nga nabulit sa dugo ug patay na.

Samtang nagdagan ang imbestigasyon, matod ni Abad nga nakita ni Bacaltos nga siya masakpan, busa siya niangkon sa kremin.

Sila si Allan ug iyang ubang mga anak nanga-shock sa gihimo sa suspek.

Niangkon si Bacaltos nga mosurok ang iyang dugo nga magtan-aw sa iyang mama, ilabi na kon sungogon sila maong nalimot na siya sa kaugalingon.

“Mao na iyang balik nga estorya para walay mag-antos, patyon na lang niya,” dugang ni Abad.

Kasong parricide ang giandam sa kapulisan nga ipasaka batok kang Bacaltos.

Nagpaabot sab sila sa report sa Soco sa autopsy sa biktima kun pila ka buok ang mga samad nga naangkon.