DI MAKABOTO ang bisan kinsa nga makompirma nga positibo sa Covid-19 sa nasyonal ug lokal nga eleksyon sa Lunes, Mayo 9, 2022.
"As of today, dili sila pwede makagawas," pagtin-aw ni Davao City Covid-19 Task Force spokesperson Dr. Michelle Schlosser sa paghinabi kaniya sa radyo kagahapon, Miyerkules, Mayo 4.
Sumala ni Schlosser, ang Davao City duna 24 ka aktibong kaso sukad Mayo 4 nga naadmitar sa isolation facilities ug balay tambalanan alang sa gidugayon sa ilang pag-rekober, busa di sila tugtan nga mogawas atol sa adlaw sa eleksiyon.
"I don’t think they are also, kining mga infected individuals, fit na magpila kay lain man ilang paminaw. They are actually sick," matud niya. "As of today na siya, that might change kay naa pa man days. But as of today, wala gyod ta chance na makagawas atong isolated, infected Covid-19 positive patients para makabotar."
Kadtong mga botante kinsa dunay makit-ang mga simtomas sa Covid-19 o influenza-like illnesses (ILI) sama sa taas nga temperatura apan wala makompirma nga kaso, matag voting center dunay gidesignar nga Isolation Polling Precinct kon diin sila makaboto.
Dunay mga personahe gikan sa Department of Health (DOH)-Davao ug Covid-19 Task Force nga magmonitor sa mga botante sa adlaw sa eleksiyon.
Sumala ni Commission on Elections (Comelec) Assistant Regional Director Gay Enumerables, mga botante nga dunay temperatura nga molapas og 37.5 degrees paadtoon sa isolation polling.
Gawas niini, mga botante gimandoan sab nga magsul-ob og face masks ug mosunod sa social distancing apan face shields di na kinahanglan.
Bisan tuod kon gilibkas na ang social distancing sa Davao City ubos sa Executive Order 11 Series of 2022, gikinahanglan kini atol sa adlaw sa eleksiyon isip paagi nga luwas batok sa pagtakod sa Covid-19.
Mga pasyente sa Covid-19 nga makasupak sa ilang isolation ug quarantine restriction magsagubang sa linugdangan niini ubos sa Republic Act 11332 Mandatory Reporting of Notifiable Diseases and Health Events of Public Health Concern Act.