PIPILA ka mga vote counting machines (VCMs) ang nakasinati og mga depektong teknikal atol sa gihimong "final testing and sealing" sa pipila ka mga tulunghaan sa siyudad sa Davao Huwebes, Mayo 5, 2022.
Ang maong mga VCMs maoy gamiton alang sa nasyonal ug lokal nga bugnong lugaynon sa Lunes, Mayo 9.
Gipailawom sa dinungan nga "final testing and sealing" ang mga 4,000 VCMs sa Davao Region Huwebes.
Gisulti ni Comelec Assistant Regional Director Gay Enumerables sa press conference niadtong Miyerkules, Mayo 4, nga ang maong kalihukan gilusad sa tanang pampubliko nga tulunghaan nga magsilbi isip polling precincts sa tibuok rehiyon.
Sa Magallanes Elementary School, usa ka VCM nakasinati og teknikal nga sayop.
Ang teknikal nga sayop mahitabo tungod sa pagkaaberiya sa papel sa sample ballot nga moresulta sa pagkalangay sa proseso sa "final testing and sealing" sa eskuwelahan.
Si Mary Jane Sarillana, School Principal I sa Magallanes ES, nagsulti nga gawas sa gagmayng depekto, andam na sila tanan sa eleksiyon.
Samtang sa Bolton Elementary School naghimo sab sa ilang "final testing and sealing" apan wala sila makasinati og mga depekto sa ilang VCMs.
Si Sharon Pechora, school principal I sa Bolton ES, nagbutyag nga importante ang "testing" aron nga malikayan ang kahasol sa proseso sa pagboto sa Lunes.
Hinuon, gisulti ni Enumerables nga tanang mga VCMs gideliber na ngadto sa mga "polling schools" sa rehiyon. (Ailene Jay C. Buntilao, Dnsc Intern)