SERYUSO ang Philippine Basketball Association (PBA) sa ilang plano nga modawat og duha ka expansion teams sa umaabot.

Nagkanayon si PBA chairman Ricky Vargas nga gituki og maayo atol sa board of governors planning session ning bag-uhay lang sa Boracay human adunay laing mga kompaniya ang ningpadayag og interes nga mosalmot sa liga.

Sa kasamtangan, ang labing unang professional nga liga sa Asya adunay 12 ka miyembrong teams.

“When it was reported to us that there is some interest to come in, we said, why don’t we start looking at expansion to 14?,” matod ni Vargas nga napatik sa www.pba.ph.

“Because expansion to 13 will be more difficult to manage. So the board actually agreed that maybe, we should look at expanding to 14.”

Katapusang nidawat og expansion teams ang PBA niadto pang 2014. KIni mao ang Kia ug Blackwater.

Sa laing bahin, mosubay na’g balik ang PBA sa regular nga tulo ka mga komperensiya nga format alang sa 47th season nga sugdan karong Hunyo 5, 2022.

Wala na kini nagamit nga format sukad sa pagkuyanap sa Covid-19, kapin sa duha na ka mga tuig ang nakalabay.

Karon nga ning-ubos na ang mga kaso sa Covid-19 sa nasod, nakadesisyon ang PBA nga hinayhinay nang ibalik ang naandan niining mga pamaagi. (ESL)