‘Tupad’ gigamit sa eleksiyon?; Dole mosusi

GIKATAKDANG imbestigahon sa Department of Labor and Employment sa Central Visayas (Dole 7) ang mga pasangil nga gigamit ni outgoing Cebu City South District Representative Rodrigo “Bebot” Abellanosa ang usa sa ilang mga programa sa pagpalit og botos.

Si manlalaban Ernesto Rama nisuwat ngadto sa Dole 7 niadtong Mayo 2, 2022, aron imbestigahon ang giingong listahan sa mga indibidwal nga gisaaran nga sila mahimong benepisyaryo sa Tulong Pangkabuhayan sa Ating Disadvantaged/Displaced Workers (Tupad) program sa ahensiya.

Matod ni Rama nga nahitabo ang insidente sa Asian College of Technology (ACT) nga gipanag-iya ni Abellanosa ug didto usab sa Barangay Guadalupe ug Mambaling.

Matud pa sa suwat ni Rama nga ang maong mga indibiduwal gisultihan nga mobalik sa usa ka piho nga petsa aron makadawat sila og P500 isip downpayment sa ilang suweldo sa Tupad ug ang nahabilin nga balanse mabayran human sa piniliay.

“We think the giving of cash as down payment is an act of vote-buying,” matod ni Rama.

Gipangutana ni Rama ang Dole 7 kon ang giingong laraw gitugot ba sa ahensiya ug kon ang aksiyon sa paghatag og down payment sa gituhoang suweldo sa Tupad nahisubay sa kasamtangang lagda ug regulasiyon nga gilatid sa balaod.

Si Dole Undersecretary Victor Del Rosario nitubag sa suwat ni Rama ug niingon nga ang Tupad program gihimo pinaagi sa buhatan sa ahensiya ug ang pag-apod-apod sa sweldo ipadala ug gipagawas pinaagi sa nagkalainlaing money remittance service providers.

“Ang atong mga money remittance partners maoy mopadala og mensahe ngadto sa mga benepisyaryo nga mahimo na nilang i-claim ang ilang suholan,” matod ni Del Rosario.

Matud pa ni Del Rosario nga ang Dole mohimo sa gikinahanglang validation sa mga akusasiyon ni Rama.

Si Abellanosa wa modagan karong piniliay apan ang iyang anak nga si BG, makig-atbang kang incumbent Councilor Edu Rama karong eleksiyon alang sa pagkalingkod sa House of Representatives.

Ang SunStar Cebu nisuway sa pagkontak kang Abellanosa alang sa iyang habig sa maong isyu apan hangtod sa pagsuwat, wala pa mohatag og tubag ang outgoing congressman.

Samtang si Mayor Michael “Mike” Rama nikompirmar sa SunStar Cebu nga si Ernesto Rama konektado sa Barug-PDP Laban party isip kabahin sa ilang legal counsel.

Matud ni Rama nga nangayo sila og serbisyo sa abogado aron masiguro nga malinawon ug hapsay ang piniliay sa dakbayan.

“It goes without saying that he is given already what we call the empowerment to do what we believe that will bring... what ought to be a peaceful and orderly election,” matod ni Rama. (IRT)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph