Kon hisgutan ang Zamboanga City unang mosantop sa atong huna-huna mao ang mga vinta nga very colorful ang mga layag ug usa kini sa mga karaang siyudad sa nasud.
Apan adunay usa ka dapit sa Zamboanga City nga angaya ilakip sa inyong bucketlist kay gawas nga kini ‘hermosa’ o nindot sa Chavacano, ug matabangan ang ilang lokal nga komunidad.
Ang Once Islas usa ka bag-ong eco-cultural tourist attraction nga gibuksan sa publiko niadtong 2018. Ang dapit nahimutang sa Moro Gulf sa mga utlanan sa Barangay Panubigan ug Dita nga usa ka oras ang gilay-on gikan sa Pueblo o ang city proper sa Zamboanga City.
Tungod sa Covid-19 pandemic gisira og balik ang tourist spot sa publiko, apan tungod sa loosened restrictions gitugtan na ang pagbisita diri.
11 KA ISLA
Ang ngalan gikuha gumikan kay adunay 11 ka mga matahum nga isla ug islets.
Ang mga isla mao ang Bisaya-Bisaya, Baung-Baung, Buh-Buh, Sirommon, Sallangan, Simaddang, Lambang-Lambang, Panganak, Lampinigan, Baguias, ug Kabugan.
Apan, tungod kay ang Once Islas usa pa ka “untouched haven” ug ang lokal nga komunidad hugot nga nanalipod sa maong dapit, upat sa 11 ka isla pa ang gibuksan nga mamahimong kasuroyan sa publiko nga naglangkob sa: Bisaya-Bisaya, Baung-Baung, Buh-Buh ug Sirommon.
Ang white sand, crystal-clear waters ug ang rock formations sa enchanted nga Once Islas siguradong makawala sa imong stress ug mga problema sa kinabuhi.
LUWAS
Usa sa mga gikabalak-an niadtong interesado nga mobisita sa mga isla ang safety ug security sa lugar.
Di maguol kay ang tanan nga atong nadunggan nga negatibo kabahin sa pagbisita sa Zamboanga City di na angay pang panumbalingon.
Base sa akong experience nga kapila na nibalik sa Zamboanga City, makaingon ko nga relatively safe na ang siyudad, ug para nako mas safe pa adtuon kaysa sa uban nga mga lugar nga akong nabisita sa Pilipinas. Ayaw itugot nga ang kahadlok makapugong nimo sa pagbuhat sa mga butang nga imong gidamgo.
Bisan pa og peaceful ang lugar sa Once Islas, ang kagamhanan sa dakbayan nagkinahanglan gihapon nga adunay military escorts nga mokuyog sa imong pagbisita, aron paghupay sa imong mga kahadlok.
Sa akong experience nga ako ra ang naka-book kaniadtong Marso 29, gikuyogan ko sa unom ka military personnel. O, diba, murag VIP treatment?
UNSAON PAG-ADTO?
Wa itugot ang walk-in sa Once Islas, maong kinahanglan ang online booking. Simple lang ang pag-book, kinahanglan ra nga mo-email og booking inquiry sa onceislas@gmail.com, ug padad-an ka nila og steps, guidelines, rates ug fees sa imong bisita.
I-andam pud ang inyong vaccination cards tungod kay i-attach kini sa email.
Kon nahimutang na ka sa Zamboanga City, mamahimong mosakay og van sa Pueblo o mag-atang og mga bus sa highway nga modiretso sa ubang lugar sa Zamboanga del Sur ug sabuta ang driver o ang konduktor nga manaog ka sa eskina Barangay Panubigan.
Mosakay ka og habalhabal paingon sa Panubigan Mini Pier ug pangayuon sa staff didto ang tanang rikisito sa imong pagbisita ug papirmahon ka sa heath declaration form.
Kon okay na ang tanan, dad-on na ka sa mga bangkero sa Once Islas.
PAHINUMDOM
Ayaw gyud kalimti ang pagdala sa imong vaccination card ug ang pagsul-ob og face mask.
Ginadili pud ang pagdala og whole lechon, ang pag-asal og mga pork products ug ang pagdala sa mga ilimnong makahubog sa mga isla. Kini agi og pagtahod sa local Muslim community.
Tungod kay ang dapit usa ka protected area, ginadili ang pagdala og single-use plastic ug paglabay o pagbilin og basura.
Ginadili ang pagdala og mga balas o seashells human sa pagbisita.
Ug aron nga magpabilin ang pagkasagrado sa lugar, ginadili ang pagtukar og music. / Aerial shots gikan sa Turismo Local de Zamboanga, Norwin Detalla