Kapin sa P23 million nga balor sa illegal nga drugas ang nasakmit sa kapulisan sa Central Visayas sulod lang sa usa ka adlaw nga dungan nga anti- criminality and law enforcement operations.
Nagsugod ang ilang dungan nga operations sa Mayo 4-5, 2022 nga niresulta sa pagkasikop sa 459 ka mga tawo nga nakahimo sa managlahing krimen diin 134 niini drug personalities, giila nga mga high value individual sa regional level.
Sa dungan nga operations, nakasakmit ang kapulisan og 3,400.12 gramos sa gituohang shabu nga adunay standard drug price nga P23,120,816 lakip na niini ang 5,000 gramos sa pinauga nga marijuana nga mokantidad og P600,000.
Nakadakop usab sila og 11 ka mga tawo atol sa operations batok sa loose firearms nga niresulta sa pagkasakmit sa 120 ka mga armas nga way mga papeles ug lima ka mga eksplosibo.
Sa kampanya batok sa illegal nga drugas, nakasikop sila og 129 ka mga tawo sa 67 ka operations nga gilusad, diin ilang nakuha ang P11,792 nga patad ug mga gambling paraphernalia.
Nakadakop usab silag 185 ka wanted persons nga adunay mga pending warrants of arrest nga giluwatan sa korte.
Tungod niini, matod ni Police Brigadier General Roque Eduardo Vega, hepe sa Police Regional Office 7 (PRO 7) nga bisan sa ka busy sa kapulisan sa ilang pagpangandam sa eleksiyon, wala nila biyai ang ilang kampanya batok sa kriminalidad.
“PRO7 remains at the forefront in the fight against illegal drugs and crime in the region,” matod ni Vega.
Iyang gidayeg ang mga police personnel sa tibuok rehiyon 7 nga adunay dedikasiyon sa ilang trabaho aron proteksiyonan ang publiko batok sa mga criminal.