Duha na lang ka adlaw sa dili pa ang piniliay, gisubli pagpahinumdom sa Commission on Elections (Comelec) ang mga general instructions alang sa mga botante aron mahibaw-an kon unsa ang angay nga mga buhaton aron makabotar sa Mayo 9, 2022.
Kini base sa giluwatan nga Resolution No. 10727 sa Comelec. Aron nga mahatagan og kahigayonan ang tanan nga makapadayag sa ilang katungod, busksan sa alas 6:00 sa buntag ang presinto aron makabotar ug motapos sa alas 7:00 sa gabii.
Kon duna pa’y mga naglinya sulod sa 30 metros atubangan sa polling place, tugotan gihapon sila nga makabotar.
First come, first served ang pag botar. Pasabot niini nga gidili ang paghatag og priority number, apan sama sa mga persons with disability (PWD) , senior citizens ug buntis, dunay fast lane nga giandam alang kanila.
Sa dili ka pa moadto sa presinto, ayaw kalimot pagdala sa imong kodigo, ballpen, ug labaw sa tanan ang pagsul-ob og facemask.
Inig abot nimo sa tunghaan kon asa ika na-assigned nga precinct, gikinahanglan ka nga moagi sa temperature checking ug i-sanitize ang imong mga kamot sa medical officer.
Kon masayran nga duna kay nasinati nga simtomas sa coronavirus disease (Covid-19) sama sa hilanat, ubo ug sip-on, may mga giandam nga isolation area aron makabotar ka.
Alang sa mga walay simtomas ug nakatuman na sa health protocols, mahimo na nga moduol sa Voters’ Assistance Desk (VAD) ug mangutana kon asa imong polling place (classroom).
Apan kon nahibawo ka na, mahimo ka nga moderetso sa imong polling place ug pangitaa ang imong pangalan sa Posted Computerized Voters’ List (PCVL) nga gipaskin dapit sa pultahan.
Anaa sa napulo (10) ra ka botante ang pwede nga makasulod sa presinto. Kon puno pa, lingkod una sa “holding area”. Kon duna nay available spot, pwedi na nga mosulod aron mobotar.
Sa maong higayon, mag sanitize na sab una makasulod sa presinto. Inig sulod, duola ang poll clerk sa Electoral Board. Isulti imong ngalan ug sequence number nga naa sa PCVL.
I-verify sa poll clerk kon naa ba ka sa Election Day Computerized Voters’ List (EDCVL). Kon wala imong ngalan, basin wala ka nagtan-aw sa PCVL sa pultahan, sayop nga polling place imong nasudlan.
Pangitaa sa lain nga polling places o kon wala gyud, adto reklamo sa Comelec office sa siyudad o lungsod.
Kon naa imong ngalan, i-check sa poll clerk kon naa nabay stain sa indelible ink ang imong mga kuko.
Kon wala pay ink, tapos nailhan ka na o walay mi-question sa imong identity, iya kang papirmahon sa EDCVL ug ihatag ka ngadto sa chairperson sa Electoral Board.
Sa di pa ihatag ang balota, pirmahan kini sa chairperson; susiha kon limpyo ba ug wala pay marka sa pagbotar ang imong gikuptan nga balota nga isulod sa ballot secrecy folder.
Kon nahuman ka na sa briefing, mahimo na nga modiretso sa voting desk o lingkuranan. Naa na sa balota ang mga ngalan sa kandidato. I-shade ang imong pilion ug ayaw hugawi ang balota. Siguraduha nga dili magsobra ang ma-shade kay kon mosobra, dili na kini dawaton sa Vote Counting Machine (VCM).