Lockdown?; Officials: fake news

Lockdown?; Officials: fake news. (File photo)
Lockdown?; Officials: fake news. (File photo)

Ang Cebu City Emergency Operations Center (EOC), Dept. of Health (DOH) 7 ug kapulisan, nanghimakak nga dunay lockdown human sa eleksiyon sa Lunes, Mayo 9, 2022.

Ilang gihulagway ang nikatap nga mga hungihong nga fake news.

Si Konsehal Joel Garganera, deputy chief implementer sa EOC, nisalikway nga adunay nag-ung-ong nga lockdown nga naghuwat human sa eleksiyon.

Sa usa ka press conference sa Biyernes, Mayo 6, si Garganera niingon nga ang mga tawo nga nagbaligya niining peke nga impormasyon nagmugna lamang sa wala kinahanglana nga kabalaka sa publiko.

“For the past weeks, we have been hearing rumors circulating not only in social media even bisan sa sulod sa mga sityo nga matod pa nila, mo lockdown kuno ang Cebu inig human sa eleksiyon. Para nako, dako kaayo ni siyang binoang,” matud pa ni Garganera.

Gidugang sa konsehal nga pipila ka mga tawo ang nagtandi sa kahimtang sa India nga nakasinati sa pagdagsang sa mga kaso sa coronavirus disease (Covid-19) pagkahuman sa ilang eleksiyon.

Matod ni Garganera nga lahi ra kaayo ang sitwasiyon sanglit tulo ra ka porsiento ang vaccination rate sa India samtang dinhi sa dakbayan sa Sugbo, ang gidaghanon sa nabakunahan nga mga indibidwal milabaw na sa target nga populasiyon.

“If we might be experiencing spike, dugay na unta. Gani, daghan ta og karon nga political gatherings by the hundreds of thousands, pero did we ever experience a spike or any slightest sign nga nisaka atong kaso? Wala,” ni Garganera.

Si Dr. Mary Jean Loreche, chief pathologist sa Department of Health sa Central Visayas (DOH 7), sa iyang bahin, niingon nga “rumors on post election lockdowns are baseless, for now.”

Si Loreche nagkanayon nga ang mga kaso sa Central Visayas, partikular sa Cebu Island, nagpabiling ubos kaayo samtang ang capacity utilization rate alang sa DOH-retained o public hospitals ug private hospitals anaa sa luwas nga numero o ubos sa 60 percent capacity utilizaton rates.

Siya niingon nga ang capacity utilization rate sa mga pampublikong tambalanan sa Sugbo anaa lamang sa 29.3 porsiyento samtang 12.7 porsiyento lamang sa mga pampublikong tambalanan.

Dihang gipangutana kon adunay posibilidad nga ma-lockdown pagkahuman sa Mayo 9 nga eleksiyon, ang pangu nga pathologist miingon nga wala’y timailhan o bisan unsa.

“What we need to remind everyone is to practice our minimum public health measures especially this coming election day,” dugang niya.

Bisan ang CCPO nihulagway niini nga “fake news.”

Matod ni Police Lieutenant Colonel Wilbert Parilla, deputy director for operations sa CCPO, nga wala kini kamatuoran ug fake news ang gipakatap sa social media.

IKIHA

Tungod niini, adunay gitahasan ang kadagkoan sa CCPO sa pagsusi kinsa kining mga tawo nga nagpasagad og post sa Facebook nga nakahatag na hinuon og kahadlok sa publiko aron ilang pasakaan kinig kaso.

“Wala gyud na siyay basehan ang kanang mga speculations kanang naa karon sa social media nga dunay lockdown. In the part of the police, we are monitoring with this kon kinsa nang nagpakatap og estorya, nag post sa social media nga dunay lockdown after sa election,” matod ni Parilla.

Ang PNP Regional Anti-Cyber Crime Unit 7 (RACU) ang gitahasan nga mo-monitor niining maong mga tawo nga magpataka na lang og share sa social media.

Giawhag usab ni Parilla ang mga netizen sa di pag-share sa maong impormasyon sa social media sanglit mamahimo sila nga maapil sa pagpasakag kaso sa kapulisan. (IRT, MKG, AYB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph