Giawhag sa Philippine Atmospheric, Geophysical, and Astronomical Services Administration (Pagasa) ang publiko sa pagbotar sa sayong buntag o hapon sa Mayo 9, 2022, aron malikayan ang kahasol tungod sa grabeng kainit.
Si Pagasa Visayas Weather Bureau Chief Al Quiblat nitug-an sa SunStar Cebu, Biyernes, Mayo 6, nga ang temperatura atol sa adlaw sa eleksiyon mahimong moabot sa 32 degrees Celsius nga adunay maximum heat index nga 39 degrees Celsius.
Matod ni Quiblat nga labing maayo sa oras sa pagbotar sa dili pa ang alas 10:00 sa buntag o pagka alas 4:00 sa hapon nga dili kaayo init ang temperatura.
Ang Commission on Elections nipahibawo nga ang pagbotar magsugod sa alas 6 sa buntag ug mosira sa alas 7 sa gabii sa samang adlaw. Ang mga botante giawhag usab ni Quiblat sa pag-inom og daghang tubig, pagdala og payong, face towel, ug pagsul-ob og light color ug light dresses kutob sa mahimo.
Sa forecast sa Pagasa karong Lunes, kasagaran maayo ang panahon sa tibuok adlaw.
Hinuon, anaa gihapon sa 20 porsiyento ang posibilidad sa pag-uwan sa hapon ug gabii tungod sa localized thunderstorms.
Ang Emergency Operations Center (EOC) sa dakbayan sa Sugbo niingon nga ang mga tawo nga adunay taas nga temperatura sa lawas sa pagsulod sa polling precincts ibutang sa isolation facility sa tunghaan.
Si EOC deputy chief implementer ug Konsehal Joel Garganera niingon nga ang temperatura sa matag botante susihon matag 15 minutos.