Grabe kaayo ang response sa publiko sa pagbukas sa Cebu-Cordova Link Expressway (CCLEX) niadtong Abril 30 kay grabeha kataas sa linya sa mga sakyanan. Niresulta gud ni sa kahuot sa trapiko sa lungsod sa Cordova nga niabot sa portion sa Lapu-Lapu City.
Sud tingali sa tulo ka mga adlaw, mao ni ang kahimtang ug talan-awon sa habig sa CCLEX sa lungsod sa Cordova. Apan ning pipila ka mga adlaw nga nakalabay, hapsay na man kaayo ang dagan sa mga sakyanan.
Apan di pa makaagi ang mga pedestrian sa ikatulong taytayan kay sa Hulyo pa. Sama ra sab ni sa mga motorsiklo nga 125cc ngadto sa 399cc nga sa Hulyo pa usab tugtan sa pag-agi. Unsa kahay mahitabo unyag magbukas na ang taytayan alang sa mga jogger ug nagbiseklita? Magdasok sab?
Ang bike lane dunay gilapdon nga 1.5 meters nga igo ra gyud nga maarang ang usa ka biseklita. Lisod tingali kon magdungan ang nagbiseklita ug jogger, sama anang uban nga naa daplin sa karsada nga mahug na hinuon nga sama sila og mga tag-iya.
Kon mag bike sa CCLEX, kinahanglan nga mag singe file kay di lapad ang lane. Maorag huot alang sa duha ug kuyaw pa sa disgrasya ug mangalamba.
Hayan, dinhi mag-abot na ang road bikers ug mountain bikers. Mosamot na usab sa kadaghan ang mga tawo nga moadto lang og Cordova aron makaagi sa CCLEX. Ganahan moagi kay libre baya.
GIBANTAYAN
Di usab makabinuang ang mga mangagi nga bikers sa CCLEX tungod kay gawas sa 100 ka mga camera nga dunay speed censors, naa say magpatrolya nga security officers. Kon dunay magbinuang, dali ra silang makaresponde. Kon dunay simbako maaksidente, makatabang gilayon siya.
Di sab tingali tibuok tuig paagian sa bikers ang ikatulong taytayan tungod kay duna may mga panahon nga kusog kaayo ang hangin. Sagad sa panahon ang hangin nga masinati mao ang ting Habagat ug Amihan. Kanang mga higayuna dako og kahigayunan nga di paagian ang CCLEX sa bikers.
Bisan gani sa unang duha ka mga taytayan, kadaghan na ko naka experience og kakusog sa hangin samtang nagtadlas sakay sa scooter. Maora kag mapalid sa hangin. Imagine sa scooters, naa pay angkas, maora man gani og madagit, unsa na kaha ang biseklita? Manaka gani ta sa CCLEX nga mag bike, mag-amping lang gyud ta.
DI ABUSOHAN
Karon nga gibuksan na ang CCLEX, daghan pa gihapon ang mag selfie ug mag groupie, apil na ning akong mga higala. Kana gud bisan kon sila nasayod nga di mahimong mohunong sa tibuok taytayan. Nipahibawo na gani ang local government sa Cordova nga ang portion sa karsada nga dunay broken white lines sa ilang habig alang sa emergency.
Kon unsa man gani ang mga lagda, kinahanglan nga atoang sundon kay sibilisado man ta. Alang ra sab ni sa kaluwasan sa mga mangagi sa bridge.
Kitang bikers, kon moabot na ang panahon nga tugtan kita sa pagtadlas sa CCLEX, atoang tahuron unsay mga lagda nga gipatuman sa bridge management. Maayo na kaayo ang libreng paggamit sa taytayan. Di nato abusohan.