Gisugdan na ang proyekto sa pabalay sa Tipolo Residences pinaagi sa usa ka groundbreaking ceremony nga gipangulohan sa mga opisyal sa dakbayan sa Mandaue.
Kini gitumong sa paghatag og kabalhinang dapit sa dul-an sa 500 ka mga biktima sa sunog nga niigo sa Sitio Basubas ug Maharlika sa Tipolo niadtong 2019.
Ang LGU sa Mandaue City, pinangulohan ni Mayor Jonas Cortes ug Bise Mayor Glenn Bercede, pormal nga nagsugod sa ilang housing project nga gitawag og Tipolo Residences sa usa ka groundbreaking ceremony sa Sitio Maharlika, Tipolo, Mandaue City, niadtong Biyernes, Mayo 6, 2022.
Ang seremoniyas gitambongan usab sa pipila ka mga benepisyaryo, mga konsehal sa dakbayan, ug mga opisyal sa Housing Urban and Development Office (HUDO) sa dakbayan sa Mandaue, nga maoy nag-unang nagdumala sa proyekto.
Kini ang una sa lima ka tenement nga ilang gitinguha nga tukuron. Ang tanan mahimong berde nga mga bilding nga mao ang una sa siyudad.
Target sa Mandaue City LGU nga ma-relocate ang dul-an sa 1,600 ka mga pamilya sa maong mga edipisyo nga biktima sa sunog nga niulbo sa Sitios Basubas ug Maharlika sa Tipolo niadtong Hunyo 27, 2019.
Gibutyag ni Archt. Marlo Ocleasa, department head sa City Planning and Development Office (CPDO) sa Mandaue City, sa mga tigbalita nga target nila nga masugdan ang pagtukod sa unang edipisyo nga adunay budget nga Php160 milyones sulod ning tuiga nga mahuman sulod sa 180 ka adlaw.
Matod ni Ocleasa nga adunay gibana-banang 80 ka mga pamilya ang mo-okupar sa unang building. Kini nga mga benepisyaryo pilion pag-ayo sa Beneficiary Selection Committee sa HUDO.
Ang umaabot nga mga tenant sa maong mga edipisyo, matod niya, mobayad ra sa bayronon sa asosasiyon alang sa pagmentinar sa bilding, nga wala pa mapamatud-i sa pagkakaron. Dugang niya nga ang groundbreaking sa ikaduhang edipisyo mahitabo usab bisan unsang orasa karong tuiga.