Naa na sa luwas nga kahimtang ang kontrobersiyal nga police official sa siyudad sa Sugbo, Police Lt. Colonel Chuck Barandog, nga gibanhigan niadtong Mayo 1, 2022 sa gabii sa dalan Pope John Paul II, corner Cardinal Rosales Street, Barangay Mabolo, dakbayan sa Sugbo.
Matod ni Police Lieutenant Colonel Maria Theresa Macatangay, information officer sa Cebu City Police Office (CCPO), nga gikan sa intensive care unit (ICU) gibalhin na si Barandog sa private room sa usa ka pribadong tambalanan.
Nagpasabot kini nga adunay maayong kalamboan sa kahimtang sa panglawas ni Barandog human sa sunodsunod nga major operations sa lawas niini aron pag kuha sa mga bala nga niungot sa iyang lawas.
DUGANG MGA SAKSI
Dugang ni Macatangay nga sa nagpadayon nga imbestigasiyon, nadugangan og duha ka mga saksi ang Special Investigation Task Group (SITG).
Apan gisaysay sa duha nga nakita lang nila ang pagpamanhig apan sa mga panagway wala.
Ang maong mga saksi gikuhaan na sa ilang pamahayag nga nitakdo usab sa unang saksi.
Niduso na usab og report ang PNP Crime Laboratory sa mga ebedensiya nga ilang nakuha sa crime scene diin duha ka matang sa kalibre sa armas ang gigamit sa pagpamusil.
Giklaro ni Macatangay nga lima ka mga basiyo sa bala nga iya sa kalibre .45 nga pistola samtang duha sa kalibre 9mm pistol nga nagpasabot nga duha ka tawo ang namusil.
Ang maong mga basiyo sa armas ang gitakdang ipaubos sa cross matching sa Forensic Laboratory Office sa ubang mga kabhang nga nakuha sa lainlaing insidente sa pagpamusil nga nahitabo sa Metro Cebu.
“Yes, that will definitely the one of the actions to be taken by the Special Investigation Task Group. Actually gi-request nana sa atoang mga investigating officers of the case nga mag cross matching sila sa uban nga mga firearms nga na-recover sa nagkalainlaing krimen diri sa Cebu City,” matod ni Macatangay.
Gilauman sa kapulisan nga makatabang sa ilang imbestigasiyon ang nakuha nila nga mga ebedensya nga mailhan nila ang mga responsabli.
Sunod semana human sa eleksiyon, magtagbo pagbalik ang mga miyembro sa SITG alang na sa pag update sa resulta sa imbestigasyon.
Sila si Barandog ug iyang asawa nga si Yvonne pulos nasamdan sa pagpamanhig luwan sa pick up nga dunay logo sa STL party-list.
Si Barandog nakaangkon og 11 ka mga samad bisan kon ang bullet holes upat lang ka buok sa windshield sa may driver’s side, timaan nga mga sharpshooter ang namusil kanila.
Sunod sunod nga mga operasiyon ang gipahigayon aron pagkuha sa mga bala nga nalubong sa iyang lawas.
Si Yvonne mao ang first nominee sa party-list, apan gisalikway sa kapulisan nga dunay labot sa pulitika ang hitabo.
Nakatutok ang imbestigasiyon sa trabaho ni Barandog hinungdan nga ilang gibalikan pagtan-aw ang dagkong mga operation niini.