Walay labot ang eleksiyon sa nahitabo nga pagpamusil sa driver sa sakyanan nga nagrekorida sa kandidato pagka gobernador sa lalawigan sa Sugbo sa Biyernes sa hapon, Mayo 6, 2022, sa lungsod sa Santander.
Matod ni Police Colonel Engelbert Soriano, hepe sa Cebu Police Provincial Office (CPPO), nga sa nigawas nga imbestigasyon sa Santander Police Station, nasuta nga pipila ka adlaw ang nakalabay, nakiglalis si Rad Andrade, 43, taga Brgy. Talisay, lungsod sa Santander, sa laing supporter sa laing pulitiko nga kontra sa iyang gilabanan nga kandidato.
Gimandoan na ni Soriano ang hepe sa Santander nga imbestigahon pag-ayo ang insidente ug ilhon ang namusil aron makiha.
Giangkon ni Soriano nga sa unang report makaduda nga election related, apan sa dihang ilang gihimo ang imbestigasiyon, walay kalabutan sa pulitika ang hitabo.
Dili kawani sa gobiyerno si Andrade sanglit gi-hire lang nga momaneho sakyanan aron molibot sa tibuok lungsod sa Santander samtang adunay sound system nga gi montar alang sa rekorida.
“Initially yan yung maisip mo kasi nagda-drive sya ng campaign vehicle. He is neither an employee of the government or a candidate, kaya hindi po namin maka categorize na election related ito. Siguro ito sa mga ano lang nagkainitan na mga supporter, ito yung tinitingnan namin,” matod ni Soriano.
Dunay gitan-aw ang mga imbestigador nga suspek, usa na niini kadtong gikalalis ni Andrade.
Tungod sa maong hitabo diin nakagawas pa ang armas ning nagkaduol na pag-ayo ang piniliay mimando si Soriano sa mga police station sa probinsya nga molusad og mga checkpoint, ilabi na sa bukid.
Sila si Andrade ug mga kauban nagrekoreda sa Biyernes sa Brgy. Talisay sa nahisgutang lungsod.
Usa ka brown nga Toyota Vios ang ni-overtake kanila, diin ang driver sa sakyanan nibukas sa bentana ug namusil kanila sa makadaghan.
Naigo si Andrade sa bukton, dughan ug wala nga bahin sa lawas. Si Andrade gidala sa Oslob District Hospital apan gibalhin sa tambalanan sa dakbayan sa Sugbo alang sa dugang pag-atiman.
GIPAKATAP
Niadtong Mayo 4, 2022 gipahibawo ni Soriano nga napakatap na ang tanan nga personnel nga gi-augment sa Police Regional Office 7 aron mo bantay sa eleksiyon.
Adunay kapin sa 400 ka PNP personnel nga gipadala ang PRO7 sa probinsya sa Sugbo diin sila ang gitahasan nga mobantay sa mga polling precincts ug polling centers.