INYANG i Mordecai abalu na ngan ing sablang milyari, pengabak na ing imalan na, misulud yang langgotsing imalan at mengana yang abu king katawan na,
linwal ya king kalungsuran, mengulisak yang masikan at asna kapait.
Dapot, mine ya king singdayu namu ning bungad ning kayaryan ning ari,
uling alang malyaring lungub a makasulud langgotsing imalan.
King balang lalawigan nung nu ing batas at utus ning ari menibatan,
ating maragul a pamanyambitan karing Udyus,
pamangiling, pamanangis at pamanalugege.
Dakal la ring pakasulud langgotsing imalan at abu.
Inyang ding mekapun at babaing talapanibala nang Esther memanyatang la
at migsalita la dikil kang Mordecai, maragul ya kalugman.
Migparala yang imalan a isulud kesa keng langgotsi, dapot e na la tinggap.
Kaybat pepayaus neng Esther i Hathak,
metung karing kapun ning ari a makatungkul kaya,
at inutus neng pakibalwan nung nanu ing magpabalisa kang Mordecai at bakit.
Inya sa’t i Hathak pintalan ne i Mordecai king makabusning bulwagan na
ning lungsud arapan ning bungad na ning piluban ning ari.
Sinabi na ngan Mordecai ing sablang milyari kaya.
Pati na ing makatud a bilang ding salapi a pengaku nang Haman
king budning ingat pibandyan para king ikasira da ngan ding Udyus.
Dininan nya naman sipi ning sulat ning utus para king pangagisan da,
a mipatalatas king Susa, bang ipakit kang Esther at ipamalino kaya,
at sinabi nang turwanan yang munta king arapan ning ari bang magmakalunus
at pagparalampwan ne para karing keyang memalen.
I Hathak mibalik ya at sinabi na kang Esther nung nanu ing sinabi nang Mordecai.
Kaybat tirwanan ne nung nanung sabyan na kang Mordecai,
“Ding sablang manibala ning ari at ding memalen ding budning lalawigan
balu dang para king balang lalaki o babai a lalapit king ari king panglub a bulwagan a e na pepayaus metung mu ing batas kabud: a ila miyatulan lang kamatayan
subali mu nung ing ari iyapse ne ing gintung mutun karela at ikabus na ing bye ra.
Dapot atlumpulung aldo na ing milabas manibat inyang meyaus ku
bang munta king ari.”
Inyang ing penyabi nang Esther mipasyag kang Mordecai,
Peparala na ing pakibat na:
“E yu isipan a neng ati kayu king pibale-bale na ning ari
ika mu kabud karing sablang Udyus ing makaligtas.
Uling nung mandatila kang manaimik ngeni, ing kapasnwan
at pangakabus para karing Udyus mangat manibatan king aliwang dane,
dapot ika at ding palipi mu mayangu kayu bye.
At ninung makibalu a dinatang kayu king budni yung kabilyan king panaung antini?”
Kaybat peparala nang Esther ing pakibat ayni:
“Ume kayu, at tipunan la ngan ding Udyus a ti king Susa,
at mangiling kayu para kanaku.
Ding talatanud ku at aku gawan mi naman ita.
Kabud merapat na ini, munta ku king ari, agya mang salang king batas.
Nung mate ku, mate ku.”
Inya sa’t i Mordecai meko na ya at tiparan na ngan ing utus nang Esther kaya.”
~ Aklat nang Esther¦Dangka 4: Sunis 1-17
(Esther 4: 1-17)
***
Ing milabas bayu pa o malambat na, ditak la mu makatalang lagyu ding dakilang babai a midukit king panalala ning mabilug a ketawan at ning mabilug a sikluban. Bayani la man o metangal kabanalan, deng babai makabusal la karing dakal a lagyu ding lalaking mekilalang bayani o nwan.
Kanitang minunang panaun at angga na ngeni, makabukud la mu ring mibantug at mekilalang babai pauli ning o da ring kadakilan a pemandapat da kilub ning makuyad a bye keti king yatu. Mananu ne wari ing dinalang banwa nung lawen ya at iyambing king kekaban na ning alanga-angga?
King panaun na ning sigwa, mamagalto la ring Moses, Ruth at Esther king busal ning lipunan.
Ating mapilan a Esther a pakabusal king lipunan tamu ngeni dapot mapilan la mu ring tune dakila at karing mapilan a deti kamemetungan ya mu ing Esther a tune bayani at dalise pusung magnasang makasuyu king bangsa king kasalungsungan.
***
Dake Talabaldugan:
1.milalangan (pangdiwa) mikalalang, mikakudta, mikayaskul. English – got created, formed or made. Alimbawa king pamangamit: “Milalangan yang bayung labwad pauli ning maragul at tapat nang kapagnasan ing taung pignasan na mu kabud kayapan.”
2.milalanganan (pangdiwa) maging sangkan bang mikakapaglalangan. English – being made the reason and tool for creation at the same time. Alimbawa king pamangamit: “Milalalangan ya ing babai at maging indu e uli namu ning lalaki nun e pauli na kabud ning kaburyan na ning Kakataskatasang Miglalang.”
3.milalangutan (pangdiwa) mipaglangut adwa o migit pa. English – beings who chew each other. Alimbawa king pamangamit: “Ila-ila mu milalangutan la ring ulimo e uli namu ning bina rang danup nung e pauli ning likas dang katakawan at kawa king daya at laman.”
***
MIKASING-KABALDUGANG AMANU TAMU
1.sora – manamdamang e mayap pauli ning milyari, depatan ding aliwa a e mayap.
2.sumami – makaranas bage e mayap, manayun o e pibuburyan, dapat ding ninu mang aliwa o karanasang milyaring miyabuban ya ing menamdaman.
3.bugnut – panamdam a e mayap manibatan king sariling karanasan king kasalungsungan o saguli pa mung milabas o merapat. Misan, pauli na mu naman ning alang kasangkan-sangkan.
4.busaktung – papasyag a karanasang e mayap a mayayakit king lupa ning makaranas. Madalas sasaryan bang mapansing.
5.simaktung – simangut at busaktung mu naman, pikuyug pangasabi.
6.simangut – gawi da ring mayna lub king e mayap o e pibuburyang karanasan o mekad agyang alang sangkan nung e mu ing sadya at akasanayang gawi.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king "garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.