Duha ka mga lalaki ang nangamatay sa duha ka managlahing mga pagpamusil ug usa ang angol sa pinusilay sa lungsod sa Tabango, Leyte pipila ka mga adlaw sa di pa ang piniliay sa Mayo 9, 2022.
Unang gipusil giila ni Police Major Ronald Espina, hepe sa Tabango Police Station, nga si Julito Cuervo, 55, minyo, lay minister sa simbahang Katoliko, taga sityo Layog, Brgy. Campokpok sa nahisgutang lungsod.
Sa imbestigasiyon sa kapulisan, si Cuervo luwan sa iyang motorsiklo samtang nag-angkas kaniya ang usa ka William Liquin padung sa sityo Layog gikan sa Campokpok Proper.
Sa ilang pag-abot sa dapit nga ngitngit, usa ka tawo nga nagmotorsiklo nipusil kang Cuervo sa makadaghang mga higayon.
Matod ni Espina nga gidala sa mga personnel sa disaster office responders si Cuervo, apan patay na kining niabot sa tambalanan.
Ang killer nipasutoy sa pagpadagan padung sa Villaba, Leyte, matod ni Espina.
Nakuha gikan sa crime scene ang upat ka mga kabhang ug usa ka slug sa bala sa armas nga wa pa matino ang kalibre.
Samtang niadtong Sabado sa alas 10:35 sa gabii, Mayo 7, patay usab ang usa ka 43 anyos nga lalaki human tabangi og rakrak sa armadong mga lalaki nga luwan sa lima ka mga sakyanan.
Ang pagpamusil nahitabo gihapon sa Brgy. Campokpok.
Ang biktima giila ni Espina nga si Dave Damayo, minyo, taga sityo Otabon, Brgy. Poblacion.
Sa imbestigasiyon nila ni Espina, ilang nasayran nga si Damayo naglingkod sulod usa ka Nissan Navara (GAM 6037) nga naka-park sa sityo Sonogon.
Kalit lang nangabot ang lima ka mga sakyanan nga gilangkuban sa usa ka itom nga Toyota Hi-Lux, puti nga Nissan Navara, Toyota Vios, grey nga Nissan Almera ug itom nga Toyota Fortuner nga gisakyan sa armadong mga tawo.
Ila dayon nga girakrakan ang Nissan Navara diin si Damayo nagpahuway.
Si Damayo natusak sa mga bala hinungdan sa iyang hinanaling kamatayon samtang ang mga gunman nanibat padung sa sityo Burabod-Omega, Brgy. Inangatan sa nahisgutang lungsod.
Nianang Dominggo sa kaadlawon, Mayo 8, 16 ka mga tawo ang gipangsikop sa 802nd Brigade sa 8th Infantry Division uban sa 93rd Infantry Battalion, human nakigpinusilay dihang sila ningresponde sa pagpusil kang Damayo sa Brgy. Campokpok.
Ang mga sundawo gipangulohan ni Captain Jay Latoza.
Human usa ka concerned citizen nakasulti kanila ni Latoza nga padung sa Tabango proper ang mga gunman, ila dayon kining gigukod.
Sa ilang pag-abot sa headquarter sa usa ka kandidato sa Brgy. Poblacion ug sa ilang pagpanganaug sa tulo ka mga sakyanan, gipamusil gilayon ang mga sundawo.
Nakapasalipod ang mga sundawo ug nakabawos nga maoy hinungdan sa pagkaangol ni Jaime Baltar, volunteer sa usa ka kandidato.
Dali nilang gidala si Baltar, kinsa samdan sa tuong bukton, sa Tabango Community Hospital.
Duha ka mga tawo nga ningsuway sa pag-eskapo ilang nasikop, lakip sa laing 14 nga diha sa palibot atol sa pinusilay.
Ang 16 ka mga tawo gidala sa Tabango Police Station samtang kasong attempted homicide giandam sa kapulisan aron ipasaka sa mga tawo nga namusil sa mga sundawo sa dapit. Nagpadayon ang imbestigasiyon sa tulo ka mga hitabo.