Way labot niini ang mga babaye kansang ngan Marites. Ang gipasabot niini mao ang mga tsismosa. Gikuha gikan sa kanta nga “Marites.” Pipila ka linya niini nag-ingon, “Ayan na ang mga Marites! /Legit na nakakainis/ Mga balita’y napakabilis/ Yung mga CCTV nyo panis.” Dunay niingon nga gikan kini sa “Mare, anong latest?”

Matod pa sa maong kanta, kusog kaayo nga mokatap ang mga balita sa mga Marites. Gani, mapan-os na lang ang footage nga kuha sa mga closed-circuit television (CCTV) cameras.

Mao kini ang gikabalak-an ni Commission on Elections (Comelec) Commissioner George Garcia nga ang mga botante, human sa pagbotar karong adlawa, moistambay pa sa mga presinto kay maniid pag unsay mga balita o mga kalamboan.

* * *

Giawhag ni Garcia ang mga botante nga inig human og botar, diretso na lang og pauli sa balay. Matod niya, “Sana ‘yung mga bumoboto, pagkaboto ninyo po sa presinto, huwag nang mag-Marites. Huwag nang pakalat-kalat pa sa polling place, umuwi na lang po kaagad, dire-diretso po sa bahay.”

Giawhag usab ni Garcia ang mga botante nga kon mahimo di magdala og mga bata sa presinto kon dunay kabinlan sa maong mga bata. Matod niya, makalangay sa eleksyon ang pagdala sa mga bata kay tanan nga mosud sa presinto kuhaan og temperatura, lakip na ang mga bata.

Wa gyud idili ang mga Marites. Si Garcia miingon nga ang ila hangyo lang nga di mag-Marites ug di magdala og mga bata. Iyang gikabalak-an nga magdagan-dagan ang mga bata sud sa presinto ug magtangtang pa sa face mask kay wa pa ra ba mawagtang sa hingpit ang Covid-19.

* * *

Alang niadtong mga tawo nga naghinam-hinam nga masayod dayon sa resulta sa eleksyon, si Garcia miingon nga ang unofficial results sa modaog sa pagkapresidente ug bise presidente mahibaw-an pipila ka adlaw gikan karon. Mas daling mahibaw-an ang mga mananaog sa lokal nga eleksyon.

Matod pa ni Garcia, mahibaw-an ang resulta sa mga mananaog sa pagkasenador sud sa tulo ngadto sa upat ka adlaw gikan karon. Sa mga ikapitong adlaw, mahibaw-an na ang mananaog sa pagkapresidente ug bise presidente subay sa partial and unofficial results.