Mokabat sa 1,000 ka personnel ang gipangdestino sa Cebu City Disaster Risk Reduction and Management Council (CCDRRMC) ning adlaw sa national ug local elections, Lunes, Mayo 9, 2022.
Si CCDRRMC Chairman Gerardo Carillo nisulti sa SunStar Cebu nga usa ka command center ang ibutang sa Cebu City Sports Center sa pagbantay sa sitwasyon sa panahon sa piliay.
Matod ni Carillo, laing command center ang gibutang usab sa residensiya ni Mayor Michael Rama aron ang mayor maka-monitor sa mga panghitabo sa dakbayan.
Dunay fire trucks, ambulances, ug emergency vehicles sa nagkalainlaing voting centers sa dakbayan, dugang ni Carillo.
Dason ni Carillo, ang CCDRRMC’s intelligence team ipangdesitno usab sa voting centers sa paghatag sa real-time assessment sa eleksiyon.
Ang personnel mohimo sa Rapid Damage Assessment and Needs Analysis nga ipasa sa CDRRMC’s command center alang sa tukma nga aksiyon.
Si Carillo nagkanayon nga ang CCDRRMC mo-monitor sa bisan unsan nga kaguliyang o hulga nga motumaw atol sa eleksiyon.
Si Carillo niawhag sa publiko sa pagdala og alcohol ug kanunay magsul-ob og face masks labi na sa sulod sa voting areas sa pagtuman sa minimum healkth standard nga gilatid sa Department of Health (DOH).
Base sa data sa Commission on Elections sa Cebu City, dunay 444 ka clustered precincts sa north district samtang 520 ka clustered precincts sa south district.
Dugang sa data, dunay kinatibuk-ang 740,711 ka registered voters sa dakbayan nga gibahin sa 339,755 sa north district ug 400,956 sa south district sa dakbayan.