NAGGUBOT ang mga suporter sa political party nga United Bangsamoro Justice Party (UBJP) sa Moro Islamic Liberation Front (MILF) sa buhatan sa Commission on Elections (Comelec) alas 8 sa gabii, Sabado, Mayo 7, 2022, sa Cotabato City.
Gibutyag ni Cotabato City Police Office Director Colonel Rommel Javier nga gibabagan sa UBJP ang pagbiyahe sa mga voting counting machines (VCMs) paingon sa mga polling precincts sa mga tulunghaan sa siyudad gumikan dako ang ilang pagtuo nga dunay matigayong nga tikas sa piniliay.
Kalit lang moulbo ang kagubot ug nagkabinatoay ang mga tagasuporta sa matag partido.
Nabuak ang salamin sa Toyota Innova nga naigo sa mga bato sa natigayong binatoay.
Nahunong lamang ang kagubot sa diha nga nag-warning shot ang mga pulis ug sundalo.
Wala sab mahuman ang "final testing and sealing" sa ubang mga polling precincts.
Daghan ang nagtuo nga posibleng maapektuhan ang eleksiyon karon.
Kahinumdoman nga una nang nagprotesta ang mga magtutudlo nga molingkod unta nga electoral boards gumikan gihulipan sila sa mga Ustadz ug mga undergraduates nga board of election inspectors gikan sa Comelec-Barmm.