Kompleto na ang roster sa Pilipinas alang sa pagdepensa sa overall championship sa 31st Southeast Asian (SEA) Games human ang delegation registration meeting sa Vietnam kagahapon.

Ang tibuok lineup sa Pilipinas naglangkob sa 981 ka individuals, 641 niini ang mga atleta nga mosalmot sa 38 ka sporting events sa multi-sporting conclave.

Ang Sugbuanong si Ramon “El Presidente” Fernandez, commissioner sa Philippine Sports Commission (PSC) ug ang chef de mission sa SEA Games, maoy mi-report sa accreditation sa PH Team.

Gitabangan si Fernandez nila ni deputy chefs de mission Pearl Managuelod ug Carl Sambrano sa pagkuha sa identification cards alang sa tibuok delegasyon sa wala pa ang opisyal nga opening ceremony karong Mayo 12 sa Hanoi, Vietnam.

“We have to make sure that everything will be in order before our athletes compete for medals. There should be no distractions as they focus on their respective events,’’ matod ni Fernandez.

Adunay 318 officials ug 18 support staff ang motabang sa atong mga atleta sa ilang mga duwa.

Ang Philippine kickboxing team nagsugod na sa ilang tinguha alang sa medalya kagahapon, diin upat ka kickboxers ang nagtinguha nga makakuha sa bronze medal sa ilang opening quarterfinals bouts.

Ang miduwa mao sila si Jomar Esteban (men’s -57kg) ug Carlos Alvarez (men’s -67kg) sa full-contact event, samtang si Kurt Ludan (men’s -54kg) ug Jean Claude Saclag (men’s -63.5kg) sa low-kick discipline.

“We have been making the rounds to the venues where our athletes will compete. Our athletes are in high spirits,’’ dugang ni Fernandez.

Ang Pilipinas mao ang overall defending champion sa SEA Games pinaagi sa dominasyon nga performance sa tuig 2019 nga gipahigayon sa Manila. Nakakuha ang Pilipinas og 149 golds, 117 silvers ug 121 bronzes.